Shillong, Risaw 30
Ka North Eastern Hill University Students’ Union (NEHUSU) bad ka Khasi Students’ Union (KSU), NEHU Unit ha ka Sngi Balang ki la ai por haduh ka shiteng synñia jong ka 4 tarik u Naiwieng ïa u Vice Chancellor ka NEHU, u Prof. Prabha Shankar Shukla ban weng kam noh shi syndon ïa u Registrar, Deputy Registrar lem bad kiwei pat kiba la shah kynnoh thung kam be-aiñ ha ka skulbah.
Nalor ka jingdawa weng kam haba ïadei bad kitei kiba la shah kynnoh thung kam be-aiñ, ka NEHUSU bad ka KSU, NEHU Unit ki la dawa ruh na u VC ban thung ïa ki Pro Vice-Chancellor ha baroh ar tylli shnat treikam jong ka NEHU – Shillong bad Tura Campus.
Ki dkhot ka seng ha ryngkat ki samla pule ki la ïalum lang habar ka ophis treikam u VC hadien ba ki la leit tur sha ka shlem treikam jong u ha ryngkat ki jingpyrta jam ïa ki sur jingpynrem. Ha kajuh ka por, ki samla pule ki la dawa ba u VC u hap ban mih shabar ban ai ka jingkular ba un pyndep ïa ka jingdawa jong ki hapoh ka por ba la buh.
Kane ka jingleit tur ka la wan jia namar ka jingleh mynthi jong u Prof. Shukla ban weng kam noh ïa u Resgistrar, u Deputy Registrar (Academics), nalor u Officer on Special Duty (OSD) bad u In-charge ka NEHU Guest House.
Ki samla pule ki la rah ruh ïa ki ‘Placard’ ban pynpaw ïa ka jingpyrshah kaba jur halor ka jingmynthi u VC haba ïadei bad kitei ki jingdawa. Na ka liang Prof. Shukla uba la wan poi ha katei ka jaka u la pynksan ïa ka jingthungkam ïa kitei ki 4 ngut ki ophisar hapoh ka skulbah.
Haba kren sha ki samla pule (ba ïakhih), u VC u la ong ba ka NEHU ka la thung da ka ‘Inquiry Committee’ bad ka Sorkar Jylla ruh ka don bor ban thaw ïa ka komiti ban tohkit ïa ki jingkynnoh kynrum-kynram hapoh ka skulbah.
Ki samla pule bad ki nonghikai ki la kynnoh ba u Registrar, Colonel (Retd.) bad u Deputy Registrar kim long kiba biang ban shimti ïa la ki kam ba la bynshet ha ki.
Ha kawei ka liang ki samla pule ki la pynpaw ïa ka jingbym ïahap halor ka jingleh u VC namar wat hapdeng ka kynrum-kynram ha ka skulbah, u dang nud ban shim shuti.
Ki la ong ba ha ka jingshisha u la dei ban don ha skulbah ban ïakren pynbeit halor ki kynrum-kynram bad lada um don jingkitkhlieh na bynta ka bha ka miat ki samla pule bad ka skulbah, kata ka bha ba un mih noh na NEHU.
Shuh shuh na ka liang ka NEHUSU bad KSU-NEHU Unit ki la byrngem ruh ban pynlong da ki jingïakhih ba tyngeh lada u VC um pynurlong ïa ki jingdawa jong ki hapoh ka shiteng synñia jong ka 4 tarik u Naiwieng.
