Washington, Risaw:
Katkum ki khubor, la ong ba kiba bun hi ki paidbah jong ka ri America kim don jingshaniah shuh ha ka sorkar bad kim don jingsngew skhem shuh hi ruh ha ka synshar paidbah bad ki ngeit ba wat lada kylliang nong ïalam ha man ki ilekshon ruh hynrei ka jing-long-jingman bad ka rukom synshar kan ym don jingpher eiei bad ka sorkar paidbah kam lah shuh ban pyntikna ïa ka jingshngaiñ bad ka hok jong u paidbah.
Namarkata, la ong ba kiba bun hi ki paidbah ki la sngew ngiah lypa ïa kane ka ilekshon President ka ban long ha une u Naiwieng ruh namar ki la dep ïohi lypa ïa ka jingïakynad bad ki jingkulmar ba la dep jia baroh shi katta, tang namar jong ka kam saiñ pyrthei bad ka jing-kwah ïaknieh bor jong ki heh nongialam.
Katkum ka kaiphod na ka jingwad bniah jong ka Associated Press- NORC Centre for Public Affairs Research, la shem ba 40% na ki paidbah kiba la don kyrteng kum ki nongthep vote ha US, ki don hapdeng ka jingbym shngaiñ bad ki pynpaw ruh ka jingsngew khia kaba jur ba kan mih beit ka jingkulmar hadien jong ka ilekshon President wat lada jop u Trump ne ka Kamala Harris.
Lada ïakren shaphang ka synshar paidbah ha kane ka pyrthei mynta, kiba bun hi ki paidbah kim ngeit shuh ha ka synshar paidbah namar ba ki la hap ban shu long khñiang kohnguh bad ki hap ban pdiang ïa kat ki aiñ ba ka sorkar synshar ri ka wanrah. Kim don lad da kumwei pat ban ïaid lait wat lada kim sngew ïahap ne sngewbit ban pyntreikam ïa kino- kino ki aiñ ba la wanrah hi da ka sorkar.
Nalor kata, wat haba ki ong ka ri synshar paidbah ruh hynrei bunsien dei u paidbah hi uba shah synshar bad uba shah ktah kylla na ka liang ka rukom synshar- khadar bad bunsien ki paidbah ki hap ban mad ïa ki jingeh tang namar ka jingbym ïabeit na ka liang synshar.
Kumta, ha kane ka por ruh, kumba 40% na ki paidbah nongshong shnong ka US ki la sngewkhia lypa halor ka synshar- khadar hapoh ka ri, watla ki hap ban jied ia ki nongïalam hynrei ki sngewthuh ba ka jingjied nongïalam thymmai ruh kan ym wanrah jingmyntoi eiei ïa ka ri bad kam lah hi ruh ban pyntikna ïa ka synshar paidbah kaba hok bad ba khuid hapoh ka ri.
