Shillong, Risaw 30
Ka Shillong Lajong ka la ïoh jingjop ba ar ha ka Meghalaya State League 2024 hadien ba ka la pynliem noh ïa ka Seinbhalang Shktentalang da 6-2 kol na ka bynta ban lamkhmat ha ka Group-E ha ka Sngi Balang ha Wahïajer bad u Kynsaibor Lhuid u la ïoh ïa ka hat-trick.
Ha kane ka jingïakhun u Kynsai (18, 37 & 90+5) u la thep ar kol ha ka kylla step, katba ïa kiwei pat ki kol la thep da u Abhay Chettri (3) bad u Deibormame Tongper (16 & 20). Hynrei ka Lajong, kaba long ka lahduh jong ka MSL 2019, kam shym la lah ban khanglad ïa ka Shktentalang na ka bynta ban pynphai kylla ar kol lyngba u Tip Rasmut (36) bad u Teibormi Tariang (71).
Ha ka Group-B, ka Sutnga ka la wanphai da ka jingjop ïa ka Riangdo Youth da 4-1 kol. Ha kane ka jingïakhun ka Riangdo ka la pynkhih jar nyng-kong eh lyngba u Bat-skhemlang Thongnirit (3). Hynrei hadien shiteng kynta ka Sutnga ka la pynphai kylla lyngba u Skhemborlang Rupai (35) bad ïa ki lai kol la thep da u Raplangki Lyngdoh (54), Cheerfulness Shadap (77) bad u Deligent Pdang (90+4).
Ka Lumsohkhlur ka la pynliem noh ïa ka Pinggera Doogisik da 2-1 kol ha ka Group-A kaba la long ha Tura. Ïa kine la thep da u Hellocomet Marbaniang (13) bad u Richmond Nongsiej (44), hyneri ka Pinggera ka la pynphai kylla shi kol lyngba u Rakanchekam R Marak (37).
Ha ka jingïalehkai jong ka Group-C kaba la long ha ka sngi kaba nyng-kong eh ha Tyrsad, ka Mawlum Tyrsad ka la mad ïa ka jingshah rem ha ka Ladthadlaboh da 0-1 kol bad ka la wan lyngba u Rangdajied Sayoo uba la thep ha ka minit kaba 20.
Haba phai sha ka jingïakhun jong ka Group-D kaba la long ha Khliehriat hapdeng ka Mulait United bad ka Ïatyllilang Lumsehkot Raliang ki la ïasam mar shi point hadien ba kim shym la lah ban thep kol haduh kaba kut ka jingïalehkai. Katba ha ka Group-F kaba la long ha Shillong, ka Pynursla United ka la jop da 2-0 kol ïa ka Patharkhmah bad kane ka la wan urlong lyngba u Riborlang Dkhar, uba la thep ha ka minit kaba 44 & 90.
Ha ka sngi Palei kan don tang kawei ka jingïakhun ha ka Group-E hapdeng ka Mawtari Myrdon pyrshah ïa ka 7 Wasa United ha Wahïajer ha ka por 2 baje nohphai sngi.
