Shillong, Risaw 30
Ka jingdon ki nongkyrshan ba shitrhem ha ka jingïalehkai phutbol ha America South ka la long kaba pynshongshit ïa ka jingïalehkai, hynrei teng-teng pat ka wanrah ruh ïa ki jingjia kiba sngewsih.
Kane ka la wan jia ha ka 27 tarik mynta u bnai ha El Campin stadium kaba ha Bogota, Colombia, ha ka lympung ïalehkai Categoria Primera A hapdeng ka Atletico Nacional bad ka Fortaleza.
Kat kum ka dur khih kaba la saphriang ha ki kor internet, kaba pyni ïa ka jingjia kaba shyrkhei bha haba uwei na ki nongkyrshan u la hap najrong ka stadium hadien ka jingïakhynñiat para nongkyrshan.
Ki khubor ki la pynpaw ba utei u nongkyrshan u la hap ha ka por ba dang ïaid ka jingïalehkai kaba la don katto katne ngut ki nongwan peitkai. Ha ka por ba jingïashad bad ka jingïakhynñiat, la ïohi ba uwei na ki nongkyrshan um shym la lah ban ïada ïalade bad u la hap na jaka shong, wat la ka jingker jong ka jaka shong ka long kaba skhem bad shngaiñ.
Ki khubor ki ïathuh ba mynta ym pat lah ban tip ïa ka jinglong jingman jong utei u briew, hynrei ka la don ka jingsngewkhia ba u lah ban mynsaw jur.
Katba ki dur khih ki la saphriang ha rynsan social media, ki nongkyrshan bad ki bor pynïaid ki la pynpaw ïa ka jingsngewkhia halor ka jingbym shngaiñ ki paidbah ha ki stadium.
Hapdeng ka jingïakhun, ka Atletico Nacional ka la ïoh ïa ka jingjop kaba kongsan bha pyrshah ïa ka Fortaleza da 1-0 kol, bad kane ka la wan urlong lyngba u Kevin Steven Viveros Rodallegas.
Wat la ka la ïalehkai tang 10 ngut, hynrei ka Atletico Nacional ka la pyni ïa ka jinglah ban ïakhun bad bat skhem ïa ka jingjop haduh bakut.
Da kane ka jingjop, mynta ka la don ha ka kyrdan kaba saw ha ka miej ïalehkai hadien 15 tylli ki jingïalehkai
