Aristotle Lyngdoh, Mawiong Umjapung
Ki la mih bun ki jingïatai shaphang u ‘Rangbah shnong’ bad ka jingïabeh thong jong u ban ïoh jing-ithuh ïaka maiñ longrynïeng jong u ka ban ïahab dur bad ka synshar khadar ka pateng mynta. Nyngkong eh, ban ithuh ïaka maiñ longrynïeng jongno jongno, donkam ban tip shwa ïaka thymmei nangno kita ki wan mih. Ha ka jingthoh kaba nga la pynmih mynshwa ha kane kajuh ka kotkhubor, nga la pyrshang ban batai kumno ka mih pyrthei ka Dorbar Shnong ha Shillong bad ki rudnong jong ka, bad ba u ‘Rangbah Shnong’ u dei u soh jong ka symboh pyrkhat tynrai ha ka spah snem ba 20th uba mih na kane hi ka jaka. Kum kane ka rukom leh rukom kam phin nym lap hangno hangno lane ha kano kano ruh ka kynhun imlang sahlang satlak ka pyrthei. Haba kumta, ngi donkam ban tih tohkit shuh shuh kumno u Rangbah Shnong u wan mih bad ïoh ïaka jingithuh paidbah?
Ka jingwad katkum ka History
Ka History ka ïathuh ïa ngi ba la jied ïa ka Shillong kum ka jaka pdeng synshar bathymmai jong ki Dohlieh Bilat ha u snem1866. Ha ka jingshisha, la ai kyrteng Shillong da u Col. Henry Hopkinson ha u bnai ïaïong 1866 da kaba shim nam ïa ka kyrteng u Lum ‘Shyllong’ uba la ñiewkyntang da ki traimuluk. Katkum ka jingïathuh u Datta Ray, “la kha ïa ka Shillong ha ka janmied jong ka 28 tarik u ïaïong 1866”, kaba long ka jaka shong sah briew kaba rit ha ka jingheh kaba 2 mail sawdong ryng-kat bad ki nongshong shnong kiba don kumba shihajar tam (ka Khanasamari1871 kaba pyni ba don 1363 ngut). Kiba bun hi ki nongshongshnong hangta bad ki rudnong jong ka ki dei ki nongtrei lane kiba don ka jingïadei kam bad ki Bor Synshar Bilat lane kiwei kiwei pat ki shlemtreikam jong ki Khristan. Ki kyntoit rudnong ba kham paw jong ka Shillong ha kata ka por, ki long ka Mawkhar, Yeodo (ïewduh), Laban. Laitumkhrah, la nang pynkha shuh shuh ïa ka European Ward bad Mission Compound hadien ba la seng ïa bun tylli ki shlem treikam jong ki Khristan. Ka jingpynbit pynbiang ïa ka shnong ka thaw ka dei ka kam barit baria ïa kaba la ñiew ba ka dei ka kamram jong ka Sorkar nongwei, ïa kaba ym ju tip bad long khyllah ha ka dustur jong ki trai muluk. Nga da artatien haduh katta katta ba kan don ka Dorbar Shnong lane u Rangbah Shnong ha kata ka por. Ki rudnong baroh ki hab hapoh ka jingpynïaidkam jong ka Shillong municipality ki Dohlieh Bilat.
Shuhshuh, ki shiphew tylli ki snem hapdeng1910 bad 1920 ki wanrah ïa kawei pat ka nuksa thymmai ha kaba la seng ïa ki shlemtreikam kum ka St. Edmund’s School, Dr. H Gordon Robert Hospital (ba ïa tip paidbah kum ka Robert Hospital) bad kiwei kiwei ha kane ka jaka pdeng synshar. Lada ki don kum kita ki kynhunsynshar shnong ha kata kapor, kine ki shlem treikam kin jin da la ïa kynduh ïa ki jingpyrkhing lane jingeh ban dakhol ne pyndonkam bad kam trai ïa ki jaka ki puta kiba heh bad ïar. Kum ban shu kdew, ha u snem 1972, la pynmih ïa ka Refugee Colony ha Rynjah khlem da don kano kano kano ka jingeh ne jingpynwit. Kane ka pynishai kdar ba ki Dorbar Shnong kim don lane kim trei kam janai. Wat lada ki don ruh, kim lah ban sharai tehlakam bad ka rukom treikamjong ki ka long kaba duna.
Ka thynriew(cradle) jong ki Rangbah Shnong
Shwa ba ka Shillong kan long sor, ka kyrdan im jong ki nongshong shnong kam ïapher na ki nongkyndong. Ka jingïashim bynta ha ka imlang sahlang bad ka jingïakyrshan markylliang ka jia tang haba don ka jingiapbriew bad ka jingleit tep leit thang ïaki metiap lane haba don ki kynja tamasa ha ka thaiñ bashong basah. Katba ka jinglong sor ka la nangsan, ki nongshongshnong ki la sngewdonkam ban don ka jingïashim bynta bakham bha bad ryntih ha ka imlang sahlang, ki da pynborlang ba dei ban don ka jingithuh bad yn khot ïa kita ki jaka bashong basah briew kum ki ‘shnong’ (locality). Nangta, ha kum kita ki khep bad katkum ka dustur jingïaburom mar kylliang, la ju jied ïa u ‘riewrangbah ban long kum u nongïalam ïa uba yn tip kyrteng kum u Rangbah Shnong. Lah ban ong, ba mih u Rangbah Shnong naka daw ba ki don ki briew bad ki longïing longsem ha kata ka imlang sahlang jong kata ka thaiñ. U la long u nongkitkam wei briew ba dei beit thik tang kumno ban ai lem ka jingïalam lynti kum u ‘riewrangbah ha kaba kyrshan ai buit ai bor ïaka imlang sahlang. Hynrei kine baroh ki long tang ki jingleh jingkam pyndep rukom khlem kano kano ka jingïadei lane jingïateh bad ki bor synshar khadar.
Dei ban buh jingkynmaw ruh ban tip ba ha kata ka por ym pat bna eiei shaphang ka symboh pyrkhat tynrai halor ka jingdonkam ïa u secretary bad kiwei kiwei ki nongkitkam shnong. Ka daw hi ka long ba ki Dorbar Khasi kim ju don kano kano ka rukom ban buh ïaka thup jingtip (system of record keeping) ïaki jingteikam jong ki. Ki jingïamynjur bad jingrai tang da kan ïaka ktien ki la biang ban shim bad ñiew ïaki kum ki thup jingtip bashonghok shong nia. Namarkata, ka symboh pyrkhat tynrai shaphang ka Dorbar Shnong bad ka Komiti Treikam (executive committee) kum ka kynhun treikam ba ha khlieh ka dei kaba thymmai jong ka pateng mynta ïa kaba la pynlong pawkhmat bad ïa bud paidbah naduh ki snem 1980 ter ter.
Ka met treikam (entity) bakhleh dustur rim bad mynta (quasi-traditional)
Khnang ban ïahab tar bad ki jingroi jingpar bathymmai,dei ban mih ruh ki Dorbar Shnong. Ka jingshna ïaka kynhun treikam ba la tip kum ka ‘executive committee’ ha kaba u Rangbah Shnong u long u khlieh jong ka, ka pynthikna ïaka jingïabyrshemlang jong ki buit treikam thymmai ka pateng mynta bad ka symbohpyrkhat tynrai u mynbarim.ïa kane la leh khnang ban pynbha ïaka rukom synshar dalade ha la ki dong ki thaiñ (local self-governance) katba ki snem ki nang wan. Da ka jingsngewthuh shaikdar ba u Rangbah Shnong u ioh ïaka jingkyrshan bad ioh mynsiem na u khlieh nongsynshar trai ri, ha kajuh kapor u ioh ïaka jingkyrshan bad ka iktiar naka imlang sahlang, namar u neh ha ka kam katba dang mon u paidbah ïa u ba un neh ha kata ka kyrdan.Watla ki bun ki jingdkoh, kane ka rukom leh ka bit ka biang bha bad ka long ka nuksa ïa kiwei ruh, ha kaba ka wanrah ïaka bor sngewthuh halor ka jingkitkhlieh bad ka jingsngew trai ïa la ka dong ka thaiñ bad ïa la ka imlang sahlang. Sniewbok pat, ha kiba bun ki khep, ïa kine ki nongrim ym ju bud bad ksoh pyrkhing da ki ‘riewshimet ba khamlahk ham ïai.
Ki Dorbar mihpli ha ki rudnong bad shabar ka Shillong
Ka jingkylla basted bad ka jingsan jong ka Shillong kum ka sor bah, ryngkat bad ka jingroi ki shlem ai jinghikai, ki lad sumar sukher, ka khaiï pateng, ki la pynkylla ïa kane ka shnong halor lum ban khring ïaki briew na kylleng sawdong ki jaka ban wan shongshnong jynduh ha ka.Ka jingmih nangta ka long ba u paid nongshong-shnong u la nang bun bad ki rudnong sawdong jong ka ki la nangroi haduh ba hap ban ïaipynmih sa ki dong ne ki kyntoit thymmai katba nangïaid ka por. Ka la kylla long ka riti ka dustur, haduh kine ki sngi,ba ki nongwan buhai shnong ba nyngkong jong kito ki kyntoit thymmai ki long ma ki ki nongïalam jong ka imlang sahlanghangto bad ki lah ban long ruh ki Rangbah Shnong. Ha ki por mynshwa ba ki briewki dang im ka jingim bashisur shidur ka rukom pynïaid kam ha ki shnong ka biang bad ïahab tar bha. Hynrei katba nangïaid ki por ki ïa, ka bor pyrkhat pyrdain jong ki briew ruh kala nangïaikylla. Ka iktiar ha ka dur ka dar u mynbarim ka kylla long pynban ka kabu ksiar ïa uba bun ban kiew pyrnon bad ban iohmad bor bad kiwei kiwei ki jingiohnong. Kane ka dei kaei kaei kaba ngi iohi ba ka ju jia ha ki nongkyndong bad ym don hi ruh uba lah ban len ba ka wanrah ïa kiba bun ki jingïakyn-at bad jingïashun bashyrkhei.
Ka jingsan, jingkongsan, jingktah bad jinglehklop
Na ka daw jong ka jingbym ban ïathuh ïa kaei ka ban jia bad ka jingkynrum kynram ka saiñpyrthei tang mar ïa ioh ïaka jinglaitluid ka ri, ym shym la ithuh mar mar bad kheiñkor eh ïaka jingsule kam jong ka Dorbar Shnong. Ka long pynban da khongpong, ha kato ka por, ba bun ki jingïatai halor ka saiñpyrthei bad ki jingïakhih ïa ksar ban pynïaid ïaki kam kiba ïadei bad ka synshar khadar la rai da ki Dorbar Hima, Dorbar Raid bad kumta ter ter. Hangne ym shym iohi dak iohi shin ei ei ba ki Dorbar Shnong bad ki Rangbah Shnong kin ïadonkti ha ka saiñ hima saiñ simajong kato ka por.
ïaka jinglong ba kongsan jong ki Dorbar Shnong la sdang ban peiphang kham jubor da ki trai muluk riewlum kiba sah ha sor tang hadien ki snem 1980 ter ter. Kane ka leit jia naka daw jong ki jingïakyn-at sngewpher jaidbynriew kiba pynmih ïakijingkulmar man ki por bad kiba la pynthut ïaka jingshongsuk shongshngain ha ka imlang sahlang.Hangne u Rangbah Shnong u shim ïaka bynta ba donbor ha khmat eh ban pynbeit ïaki kynrum kynram haduh ba u lah ban ioh ïaka jingkohnguh bad jingburom naki nongshong shnong baroh. Ka jingpyntreikam ïaki skhim MLA bad MP naduh ki snem 1990 ter ter ka la nangkyntiew shuh shuh ïaka jingkongsan ki Dorbar Shnong, ha kaba ki Bor Synshar jong ki district ruh ki hap ban shaniah bad ban ïatreilang bad ki. Kane kala ïalam shaka jingsngew bad tharai ba ka kam Rangbah Shnong ka dei ka kamba janai bad ba seisoh kaba lait na kino kino ki jingaijingkheiñ. Don katto katne tylli ki jingjia ha kaba ki Rangbah Shnong ki leh klop bad pynkyllain ïaki rukom treikam khnang ban ioh myntoi ha lade shimet.
Ka jingwad main long rynïeng ha ka synshar paidbah
Wat la ki la don shibun kiei kiei kiba u Rangbah Shnong jong ki kyntoit sor u la pyrshang ban pyntreikam na ka bynta ka imlang sahlang bad ka Sorkar, phewse hakhmat jong ki Bor Synshar dang ñiew hi ia u kum u ‘riewpaidbah. Kum u khlieh jong ka dustur mynbarim (‘quasi-traditional’ head), donkam ban batai shai kaei ka kyrdan jong u katkum ka aiñ. Ka Sanad ba la ai da u ‘Syiem’ ka dei tang ka syrwiang ban pynskhem bad pynithuh hakhmat ka imlang sahlang ïaka jingthung Rangbah Shnong ïa u, khnang ban khanglad ïaka jingmih da uwei pat u Rangbah Shnong bad ka kut tang katta. Namarkata, ha ka synshar paidbah, lada ïa ki dorbar ba la seng da ki paidbah nongshongshnong ym lah ban ai ïaka jingithuh ba dei hok ryngkat bad ka jingïasnohlang bad ki kyndon ka Riti Synshar, hato kaei mo ka kyrdan bad ka main longrynïeng jong u Rangbah shnong? Kane ka long ka jingkylli bashong nongrim bha ïa kaba baroh ngi dei ban kylli.
