Shillong, Risaw 30
Ka Rangdajied United FC ka la lah ban pynliem noh ïa ka Ryntih FC da 3-0 kol na ka bynta ban ïoh ïa ka jingjop kaba nyngkong ha ka lympung ïalehkai Shillong Premier League 2024 ha ka Sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba u Pasborlang Khonglikong uba la thep ar kol bad kawei pat la pynbud da u Manbhakupar Ïawphniaw na ka bynta ban ïoh ïa ki lai point.
Wat la ka la shah rem ha ka Mawlai SC (2-3 kol) bad ha ka Shillong Lajong FC (1-2 kol), pynban ki rangïalehkai ka Rangdajied ki la pyrshang ban ïalehkai bha ha kane ka jingïakhun kaba lai jong kane ka lympung bad kumjuh ka Ryntih kaba dang donkam ban ïoh ïa ka jingjop ba ar. Haduh kaba kut jong ka kylla step kine ki kynhun kim shym la lah ban thep kol.
Hadien katto-katne por ba la bteng ïa ka jingïakhun jong ka kylla miet ka Rangdajied ka la ïoh ban pynkhih jar nyngkong eh lyngba u Pasborlang ha ka minit kaba 78. Kane ka shi kol ka la nang pynïoh mynsiem ïa kane ka kynhun bad tang hadien 10 minit ka la thep biang ïa ka kol ba ar lyngba u Manbhakupar.
Ha shwa ban wai u Pasborlang u la ïoh ban thep biang sa shi kol ha ka minit kaba 90+3 na ka bynta ban pynlong ïa ka Rangdajied ban ïoh jingjop syndon hadien ba ka Ryntih kam shym la lah ban pynphai haduh kaba kut ka jingïalehkai.
Ka jingïalehkai ha ka Sngi Palei kan long hapdeng ka Nongthymmai SC pyrshah ïa ka Nongrim Hills SC ha ka por 5:30 janmiet, katba ha ka First Division kan long hapdeng ka Mawkhar SC bad ka Pohkseh SC ha ka por 2 baje nohphai sngi.
