Shillong, Risaw 30
U Myntri ba khmih ïa ka tnat Bording (Power), u Abu Taher Mondal u la ong ba ka dor thymmai ban thang ding ilektrik, ka dei kaba la buh da ka Meghalaya State Electricity Regulatory Commission (MSERC), bad ka sorkar kam pat ïoh hukum ei-ei halor kane.
U Mondal u la ong ba kumba long mynta ym pat lah ban ong ei-ei namar ba ka sorkar kam pat ïoh ïa ka hukum na ka Commission bad ka Sorkar kan sa lah ban kren ei-ei yn da la ïoh ka hukum na ka Commission.
“Ngi phah da ka jingthoh sha ki (MSERC), hynrei ka dei ha ka bor jong ka Commission ban pynmih ïa ka hukum halor ka dor bai bording”, u la ong.
Haba kylli, ba ka dor bai thang bording jong ki karkhana ka kham rit ban ïa ki paidbah, u Mondal u la ong ba ki don bun ki daw ha kaba ïadei bad kane, kum ka jingsiew ïa ki khajna bad kiwei ki jingsiew, bad u la pyntip ba halor jong kane ruh na ka liang jong ka tnat ka la phah da ka jingthoh.
Lah ban kdew ba ka Meghalaya State Electricity Regulatory Commission (MSERC) kaba khlieh da u Chandan Kumar Mondol ka la pynbeit dor thymmai ïa ka bai thang bording ha kaba la oh dor kham heh na ki paidbah bad kham duna na ki karkhana.
Katkum ka jingpynbeit thymmai ïa ka bai thang bording naduh ka 28 tarik Risaw mynta u snem, ki longïing ka bai thang bording ilektrik ba la buh beit shi bnai (fixed charge) ka long T.90 shi kilowatt, ka bai bording ïa ki longïing la buh ha ka dor T.5.55 shi kilowatt na ka bynta 100 unit ba nyngkong bad T.5.65 na ka bynta 100 unit ba bud. Ka bai bording jong u snem 2023-24 (fixed charge) ka long ha ka dor T.80 shi kilowatt shibnai, katba ka bai bording na ka bynta 100 unit ba nyngkong ka long T. 4 shi kilowatt.
Ka tyllong khubor na ka tnat Bording la ong ba ha shwa ba ka MSERC kan buh ïa ka dor bathymmai la pynlong shwa ïa ka jingpynsngew paidbah ban ailad ïa ki nongpyndonkam bording ba kin pynpaw ïa ka jingsngew jong ki, bad lada don ka jingpynbeit thymmai ïa ka dor, ka dei ban long hapdeng haduh 20 percent, kane ka long lada pynkiew lane pynhiar ïa ka dor.
Katkum ka hukum bathymmai la ïoh jingtip ba ka jingpynkiew na ka bynta kiba pyndonkam hapoh ka 100 units ka long kumba 1.7 percent, na ka bynta kiba pyndonkam 100-200 unit, ka jingpynkiew ïa ka bai bording ka long kumba 3.8 percent. Ha kaba ïadei bad ka jingpynduna ïa ka bai thang bording ki karkhana, la ïoh jingtip ba haba ka Commission ka la pynduna ïa ka bai thang bording jong katto-katne ki karkhana, ka pynïabiang pat ïa ka dor na ka bai thang bording jong kiwei pat ki karkhana.
Katkum ka jingtip ba la ïoh la ong shuh shuh ba ïa kane ka jingpynbeit thymmai ïa ka bai thang bording ilektrik la leh ruh da kaba pynshong nongrim ïa ka jingdonkam pisa ha ka ‘power sector’, bad ka don ka jingkwah ban pynkiew ïa ka bai thang bording da 30 percent, namar donkam bun ka pisa ruh ban siew ïa ka tulop ki nongtrei bad ka baibam ïa kiba la shongthait.
