Ïa ka spah pyrthei ym lah ban kit, tang ïa ka jingnang-jingstad, ong u Bah Sniawbhalang

Jowai, Risaw 31

Ki ‘riew shemphang ki ong, ka spah pyrthei ym lah ban kit katba ka jingnang-jingstad lah ban kit kat shaba leit bad ka dei ruh ka atiar kaba lah ban pynkylla ïa ka pyrthei baroh kawei.

Ïa kane la ong da u Symbud Myntri Rangbah ka Jylla Bah Sniawbhalang Dhar haba kren kum u kongsan ha ka sngi pynkut ïa ka jingrakhe Golden Jubilee ka Mukhla Raij UP School, West Jaiñtia Hills District ha ka 30 tarik Risaw.

U Bah Sniawbhalang u la pyrto ïa ki nongseng jong ka skul kiba ïohi jngai ïa ka jingmyntoi jong ka jingnang jingstad bad ruh ïa ki kmie ki kpa kiba kloi ban bynda ïa ki jaka puta tang ban pynnang pynstad ïa ki khun ki kti.

Nalor u Symbud Myntri la donlang ruh u Myntri ka tnat pule puthi ka Sorkar Jylla u Rakkam A Sangma, u MLA ka Jowai Bah Wailadmiki Shylla, CEM JHADC Bah Thombor Shiwat, ki MDC JHADC, ki ophisar Sorkar, ki nongïalam shnong bapher bapher, ki nonghikai, ki khynnah skul, ki kmie ki kpa, ki past pupil, ki nongshong shnong nalor kiwei kiwei.

“Lada phi kwah ban jop bad long eiei ha ka jingim ka jong phi, wat khmih lynti ban don kiba leh na ka bynta jong phi, wat ki Kmie ki Kpa jong phi ruh kim lah ban leh eiei hynrei ka dei ban sdang na lade”, ong u Rakkam A Sangma bad bynrap ruh ba mynta ryngkat bad ka jingnang jingstad dei ruh ban hikai ïa ki khynnah ban pynneh pynsah ïa ka dustur ka kolshor bad ban rah shakhmat ïa ka jingitynnad jong ka Jylla khnang ba ka pyrthei kan ithuh ïa ka.

Hadien ka jingïalang u Bah Sniawbhalang ryngkat ki kynrem ki lyndan kila plie ïa u mawnongrim jong ka jingdap 50 snem ka Mukhla Raij UP School katba u Bah Thombor Shiwat u la pyllait paidbah ïa ka kot souvenir ka jingïaid lynti jong ka skul.

Ha kane ka jingrakhe, u Bah Yeomanry Blah u la pule ïa ka khana ne history shaphang ka jingïaid lynti jong ka skul kaba la sdang naduh u snem 1974 da kaba pynkynnmaw ruh ba ïa ka Mukhla Raij Upper Primary School mynshwa la tip kum ka Mukhla Raij Middle English School.

Ha ka jingsdang ki khynnah ki don 15 ngut klass IV haduh VI. Ki nonghikai ki dei u Bah Hari R Sari kum u Headmaster, ka Kong Miket Blah, Jamly R Bang bad Bah Wilson War Assistant Teacher kila sdang ïa ka kam ban hikai bad pynroi ïa ki jingmut jingpyrkhat kiba dang samla jong ka shnong.

Ha ka jingrakhe kaba 50 snem jong ka jingshakri ïa ka imlang sahlang mynta ka jingdon jong ki khynnah ka long 700 ngut.

Kane ka jingrakhe ka la long kaba iphuh-iphieng da ka jingshim bynta ki khynnah skul ha ki jingrwai bad jingshad.