Shillong, Risaw 31
Ka lympung ïalehkai First Division Football Tournament 2024 ba la pynïaid da ka Tyrsad Area Sports Association (TASA) ka la nangjam shaphrang ha kaba ka Rangshangkham SC bad ka Kyrphei SC ki la ïoh jingjop ha ka Sngi Palei.
Ha kane ka jingïakhun kaba la long ha madan Tyrsad, ka Rangshangkham ka la pynliem noh ïa ka Umkseh SC da 2-0 kol. Kane ka nam jop ka la wan urlong lyngba u Sdangborlang L. Nonglait uba la thep ha ka minit kaba 8 bad kawei pat la pynbud da u Belstarlang L. Nonglait ha ka minit kaba 39.
Haba phai sha kawei pat ka jingïakhun, ka Kyrphei ka la jop da 3-1 kol ïa ka Laitmawhing SC.
Tang mar ïasdang ka jingïalehkai ka Laitmawhing ka la ïoh ban pynkhih jar nyngkong eh lyngba u lyngba u Bull Swer ha ka minit kaba 5. Hynrei tang hadien katto katne por ka Kyrphei ka la lah ban pynphai kylla lyngba u Bankitlang K. Syntiew ha ka minit kaba 19. Kane ka kynhun kaba la pynbud biang ïa ka kol kaba ar lyngba u Sailes Snaitang ha ka minit kaba 26.
Hadien katto katne por ba la bteng ïa ka jingïakhun jong ka kylla miet, ka Kyrphei ka la thep biang sa shi kol ha ka minit kaba 55 lyngba u Donboklang K. Mawphlang. Watla ka liang pyrshah ka la pyrshang ban pynphai, hynrei haduh kaab kut kam shym la lah ban pynurlong bad ka la mad ïa ka jingshah rem.
