Khliehriat, Risaw 31
Shibynta ka jingrakhe ïa ka National Unity Day, ka shlem treikam jong ka District Sports Officer, East Jaiñtia Hills District ryngkat ka jingïatreilang ki bor pynïaid ka East Jaiñtia, ha ka Sngi Palei ka la pynlong da ka Open Marathon na ka bynta ki nongshong shnong jong ka District. Ïa kane ka jingïakop mareh la plie da u General Secretary ka East Jaiñtia Hills District Sport Association u Bah Coming One Joy Tlang da kaba kaweh ïa ka lama na ophis u DC barim ha ka jingïadon lang ka District Sports Officer ka Kong Stephanie M. Rapsang bad kiwei ki riew rangbah.
Ha kane ka jingïamareh kaba 8.5 km la shim bynta palat 105 ngut ki nongshong shnong ka District khamtam ki samla kynthei bad shynrang. Ïa ka kyrdan ba nyngkong ha ka liang ki shynrang la rah da u Knerlang Phawa, ba-ar u Bismo Sumer bad ba lai u Rishanmehi Ryngkhlem. Katba ha ka liang ki kynthei, ka Rosy Sana ka la rah ïa ka nam lahduh, bud sa ka Wasaki Phawa bad balai ka Phyrnai Kyndait.
Ki nongjop ki la ïohpdiang da ki khusnam pisa kiba T. 5000/- bad T. 3000/-.
