Lada ym pynkylla noh sha ka ai jait kpa ka jaitbynriew kan sa duhjait. Ka ïap-them ha ka imlang ka sahlang, ka kur ka jait kan sa wan. Ngi ïohi ka jinghiar ki longïing longsem, ka kur ka jait, bad ka imlang ka sahlang ha Bri u Hynñiewtrep. Ki longïing longsem ki la hiar ym shuh kum ha ka por ba dangim ka kmie u kpa ka ïing. Mynta ki longïing ne ki rympei ïing ki la troiñ ka kamai kajih, ka ïoh ka kot, ki la hiar ha ka rep ka riang, la troiñ ha ka khaiï ka pateng, bad kiwei kiwei. Shi para trai bad shi kur shi jait ruh kim da ïa long pa-riah parai shuh. Ki la ïa jngai ym shuh kum ha ka por mynshuwa. Ka trei ka ktah, ka rep ka riang ka la hiar ym don ba bud shuh ïa ka jingïalam ki kmie ki kpa, ka khaiï ka pateng ruh ka la hiar, tip na kaei ka daw, ba ki khun kim lah shuh ban pynïar ïa ka kamai kajih, ka khaiï ka pateng kum ha ka por ba dangim ki kmie ki kpa. Phai sha ki jaka nongkyndong ka rep ka riang, ka trei ka ktah ka khaiï ka pateng ka la ring swai la jan ha baroh ki longiïng longsem ka Bri u Hynñiewtrep. Kane baroh kam dei na kane ka ai jait kmie kaba la pynsniew dur bad pyntroiñ ym tang ha ka kit khunrei, hynrei ha ka rep ka riang ka kamai kajih bad ka khaiï ka pateng ha ka ri. Ka jingïai pyneh ban pynbeit ïa ka dustur ka riti ai jait kmie ka lah ban pynduh jait ïa ka jaitbynriew. Ka ai jait kpa ka pynkhlaiñ ïa ka ïing ka sem, ïa ka kur ka jait bad ïa ka imlang ka sahlang. Kane ka long ka jingïohi jong nga kum u riewshimet.
C. B. Iawphniaw
