Shillong, Naiwieng 01
Ka tnad bording ka Jylla ka la hukum ban ïaid shakhmat bad ka jingtohkit hapoh ka jingkhmih u Inspector ka tnad bording (Inspector of Electricity) halor ka jingjia shah bat bording ilektrik jong uwei u samla ha kawei ka shnong ha South West Khasi Hills.
Kane ka long katkum ki tyllong khubor na ka tnad MeECL.
Kum ban shu kdew hangne, uwei u samla ba la tip kyrteng u Jimwilson Thongni (19 snem ka rta), khun jong ka Kong Ailinda Thongni na ka shnong Rangblang Pambriew ha South West Khasi Hills, u la duh ei la ka jingim hadien ba la suba ba u la shah bat ha ka bording ilektrik hajan ïingsah jong u katba u dang leit khar soh-ot na uwei u dieng.
Katkum ki tyllong khubor ba la ïoh lum, la ïathuh ba katei ka jingjia ka la jia ha ka step jong ka 30 tarik Risaw ha ka por kumba 8.30 baje eiei bad ïa utei u samla la lap da ki khynnah ba u la thiah lyngktar hajan u nar ‘post’ ilektrik.
Ïa utei u samla la pynkit noh mar-mar sha Civil Hospital, Nongstoiñ hynrei la ïathuh ba mar ïa poi ha katei ka jaka sumar, utei u samla u la khlad noh.
Katkum ka jingïathuh u Bah Bokstone Thongni, Secretary Shnong Rangblang, u la ong ba utei u nar ‘post’ uba don ha katei ka jaka u dei uba la ingkhong naduh na trai namar ka jinghap u sainar ding la kumba shi taïew eiei ha kaba wat ki mrad ki mreng kum ki khnai bad ki risang ruh ki la ïap ei ha katei ka jaka.
Shuh shuh u la ong ba ka shnong ka pynpaw ïa ka jingsngewsih kaba khraw halor ka jingduh noh ïa ka mynsiem ba kordor tang namar ka jingleh torti jong ka tnad MePDCL Mawkyrwat wat la ka shnong, la bunsien ka la leit ban ujor halor ka jinghap ki sainar na ki ‘post’ hynrei katei ka ophis kam shym la pynsngap satia.
Kumta ka shnong ka dawa na ka ophis ba ka dei ban leh eiei bad ka shnong kan sa phah jingthoh ruh sha ki bor bahalor bad ïa u Myntri ba dei khmih ïa ka tnad bording ban maramot noh kloi ïa utei u nar ‘post’.
Kumba long mynta ka shnong khamtam ki khynnah ki don hapdeng ka jingshong syier namar utei u nar ‘post’ u don hajan u dieng soh ot uba ki khynnah barabor ki ju leit khar soh ot na utei u dieng.
Halor katei ka jingjia, na ka liang ka Khasi Students’ Union (KSU), South West Khasi Hills, ka la ai por shi bnai ïa ka tnad bording ban ai ka bai lutksan sha ki bahaïing ha sem jong utei uba la khlad noh.
