Shillong, Naiwieng 01
Ka Mawlai, ka Sutnga, ka Rangdajied United bad ka Chipakkore ki dei napdeng ki kynhun kiba la ïoh ban khur jingjop mynta ka sngi ha ka lympung ïalehkai Meghalaya State League 2024, kaba la pynlong da ka Meghalaya Football Association ryngkat ka jingkyrshan jong ka tnad ïalehkai bad tnad jong ki samla.
Ka dei ka jingjop kaba ar sien lynter ïa ka Mawlai bad ka Sutnga, ha ka Group E bad B, katba baroh ar tylli ka Rangdajied bad ka Chipakkore, ha ka Group D bad Group A, ki la kiew sha ka 4 poiñ mar kawei hadien ba ki la ïakhaid ha ki jingïalehkai ba nyngkong jong ki.
Kawei pat ka kynhun kaba la ïoh ïa ka jingjop mynta ka sngi ka dei ka Seven United ha ka Group C. Ka la pynliem ïa ka Mawlum Tyrsad da 1-0 kol ha Tyrsad ha kaba ïa ka kol la thep da u Kenny Syiemiong (17′). Kane ka dei ka jingshah rem kaba arsien lynter jong ka Mawlum Tyrsad bad ka buh ialade ha ka rukom ba ka lah ban duh ban poi sha ka Quarterfinal bad ha ka jingartatien kaba khraw, katba ka dei ka sien kaba nyngkong eh jong ka Seven United ban mih madan bad, namarkata, ka jingjop kaba nyngkong eh.
Ka dei ka sngi kaba kyrpang na ka bynta u Khrawkupar Jana (27’P, 32′, 44′, 64, 69′, 79′) ka Mawlai, uba la thep ïa ki hynriew kol haba ka kynhun jong u ka la pynliem ïa ka Pynursla United da 11-0 kol ha Shillong.
Ka kol kaba nyngkong eh jong u Khrawkupar ka dei ka penalty hynrei kiwei pat baroh ki la wan ha ka jingïalehkai, kaba pyni ïa ka sap kaba khraw kaba une u samla u don. Hadien ba u la thep saw kol ha ka jingïakhun kaba nyngkong, u Khraw mynta u la don 10 kol ha ki jingïalehkai jong u. Kiwei pat ki nongthep kol na ka bynta ka Mawlai ki long u Reformer Pale (9′), Arkibor Makhroh (11′, 70′), Wanboklang Lyngkhoi (25′) bad u Samlang Rympei (52′).
Ka Chippakkore ka la ngat ha ka jingïakhaid khlem thep kol ha ka jingïalehkai ba nyngkong jong ka ha ka sngi Nyngkong bad i kumba kan ïaid kumjuh mynta ka sngi pyrshah ïa ka Lumsohkhlur ha Tura hynrei ka la ïoh artylli ki kol ha ki 20 minit ba khatduh na u Balthu M Marak (71′) bad u Bijay R Marak (71). 89′) ka la pynjop ïa ka kynhun trai shnong da 2-0 kol.
Ha Mawkyrwat, ka Sutnga kam shym la don kano kano ka jingeh satia pyrshah ïa ka Mawten, ha kaba ka la jop da 4-0 kol. Ka Sutnga ka la la thep ïa baroh saw tylli ki kol ha ka kylla step hi, lyngba u Raplangki Lyngdoh (5′, 45’+2), u Deligent Pdang (7′) bad u Skhemborlang Rupai (41′).
Kawei pat ka jingïalehkai jong ka sngi ka long ba ka Rangdajied ka la khur 3 poiñ ha Khliehriat da ka jingjop kaba 2-0 kol ha ka jingïakhun pyrshah ïa ka Mulait United. U Pasborlang Khonglikong (29′) u la thep nyngkong ha kaba dei ka kol ba nyngkong jong ka MSL 2024 ha Khliehriat hadien ba ki ar tylli ki jingïakhun ba la dep baroh ar kila kut noh da 0-0 kol. U paralok jong u, u Owanijuh Pajuh (90’+4) u la pynkiew ar shah ïa ka jingjop ha ka por sangeh ban ailad ïa ka kynhun ba dang ïakhun ïa ka nam lahduh ban ïaid shakhmat.
