Shillong, Naiwieng 01
U Symbud Myntri Rang-bah ka Jylla ba khmih ïa ka tnat Transport, u Bah Sniawbhalang Dhar u la ïathuh ba ka Sorkar Jylla, katba ka dang ap ban lah pynheh ïa ka Kad Liengsuiñ ka la pynkhreh ruh ban pynher ïa ki liengsuiñ na Shillong sha kiwei ki nongbah kiba heh jong ka ri, bad na ka bynta kane ka jingkhot ‘tender’ ka la ïaid mynta.
“Katba ngi dang ap ban ïoh pynheh ïa ka Kad-liengsuiñ, ngi la ïaid shakhmat ruh na ka bynta ban pynïasoh ïa ki liengsuiñ kiba rit na Shillong sha kiwei ki sorbah hapoh ka ri, kum sha Mumbai, Bangalore bad sha Hyderabad”, u la ong.
Kumba ka long mynta ki liengsuiñ kiba lah ban kiew ban hiar ha ka Kad-liengsuiñ kaba don ha Umroi kaba ju tip ruh da ka ‘Shillong Airport’ ki dei tang kiba don 72 tylli ki jaka shong, bad dei na kane ka daw kaba la pynlong ïa ka Sorkar ban thaw lad na ka bynta ban pynheh shuh shuh ïa katei ka Kad-liengsuiñ khnang ba ki liengsuiñ kiba kham heh ruh kin lah ban kit ïa ki nongleit nongwan na katei ka Kad kaba don ha Umroi.
Ha kaba ïadei bad ka jingpynheh ïa katei ka Kad-liengsuiñ, u Myntri u la ong ba hadien ka ilekshon shiteng samoi ha Gambegre, kan sa don ka jingïakynduh hapdeng ka Sorkar Jylla bad ka ka tnat Civil Aviation jong ka Sorkar Pdeng ban ïakren halor ka jingpynheh noh ïa ka Kad-liengsuiñ kaba don ha Umroi.
“Ka don ka lad ban pynheh ïa ka Kad-liengsuiñ khlem da donkam shuh ban ot ïa ki lum, bad ki don ki kyndon ba hap ban pynjynsur ïa kiba ngi hap ban ïakren bad ka Sorkar India”, la ong u Bah Sniawbhalang Dhar.
Ha u Nailur mynta u snem ka Airport Authority of India (AAI) ka la aiti ïa ka kaiphot kaba arsien, kaba pynpaw ba lah ban pynheh ïa katei ka Kad-liengsuiñ khnang ba ki liengsuiñ kiba kham heh kin lah ban kiew ban hiar.
Katkum ka kaiphot, ka jingpynheh ïa ka Kad-liengsuiñ lah ban leh sha ka phang ba shathie (South), bad ka donkam shuh shuh ka jaka sa 16 akar na ka bynta kane, donkam ruh ïa ka jaka sa 6 akar na ka bynta ban pynïeng ïa ki liengsuiñ, bad na ka bynta ka lynti her liengsuiñ ka donkam shuh sa 900 meter ban pynjrong na ka bynta ban lah ban ïaid ki liengsuiñ kiba kham heh.
Na ka bynta kane ka jingthmu la ïathuh ba ka jinglut katkum ka jingpynkhreh kaba mynta kan long kumba T.500 klur na ka Sorkar India, bad na ka bynta ka bai jaka yn pynlut da ka Sorkar Jylla.
