Guwahati, Naiwieng:
Uwei u briew u la ïap bad 11 tylli ki ïingwai ki la julor hadien ka jingpluh ding kaba shyrkhei ha surok Laxmipriya ha Sivasagar jong ka Assam ha ka por ba rakhe leh-kmen ïa ka Diwali ha ka 31 tarik , Risaw.
Ïa une u briew uba la ïap ha kane ka jingjia la tip kyrteng kum u Shyam Rai u la sahkut hapoh na ka jingklang jong ka ding ha ka jaka sah jong u kaba don marjan jong ka Sardar Police Station ha Ward 7.
La pynkit mardor ïa u sha hospital hadien ka jingjia hynrei ym shym la lah ban pyllait im namar ba la jur palat ki jingmynsaw na ka jingbam jong ka ding.
Ka jingpluh ha kine ki ïing ka la nang jur shuh shuh namar ka jingbthei jong ka tyndong lyer, ha kaba kane ka la nang pynklang shuh shuh ïa ka ding bad pur sted sha kiwei pat ki jaka ba ïajan ha kaba kham bun na kine ki dei ki jaka ba shong die jingbam ki briew harud lynti bad ki nongshna tiar da ki kti.
Ki kynhun pynlip ding na baroh ar tylli ki tnad pynlip ding jong ka jylla Assam bad ka tnad pynlip ding jong ka ONGC ki la pynkloi ban ai jingïarap halor kane ka jingjia.
Ka jingpyrshang jong ki kaba khlem sangeh ka la seisoh namar ba ha kaba kut la lah ban tem ïa ka jingklang jong ka ding.
Ki bor pynïaid shnong ki la sdang ïa ka jingtoh-kit ban lap ïa ka daw tynrai halor kane ka jingpluh, kaba la pynjulor shibun ïa ki jingdon jingem, ki mar ki mata ha katei ka jaka kaba bun paid.
