Shillong, Naiwieng 01
Wat la ïa ka ilekshon MDC sha ki District Council la pynjlan ïa ka samoi treikam da shisnem kynthih namar ka jingdon ka jingphiah bad jingpynbeit ïa ki konstitwensi ne ka ‘Delimitation Committee’ ha kaba la rai ban pynlong ïa kane ka ilekshon ha u snem ban wan.
Halor kane kajuh ka bynta, haba ïoh ban ïakren bad uwei na ki nongmihkhmat uba la rim bad pawkhmat hapoh ka Jylla, u Bah Bindo M. Lanong uba dei u MDC ba shu sieh hapoh ka KHADC bad uba dei ruh uwei na ki nongseng ïa ka seng riewlum hapoh ka Jylla, ka United Demo-cratic Party (UDP), u la ong ba katkum ka jing-sngew jong u hi shimet, ka la dei ka por ïa u ban shongthait noh na ka kam saiñ pyrthei.
“Ka mynsiem te kam da don shuh hi ban ïaleh hynrei kum kita ki jingpynsngew ki dang wan. Nga sngew ka lah biang hi katto ïa nga ba ka por ba la ïaid kumne”, ong u Bah Bindo.
U la ong ba wat la na ka liang jong u, u sngew ba ka la dei ka por ïa u ban shongthait noh na ka kam saiñ pyrthei hynrei ki la don ki paralok jong u kiba la ai jingmut ba un nym pat shongthait satia namar ha kum kane ka por, ka dang long kaba donkam ïa u ban don ha ka saiñ pyrthei ban ai jingmut ïa ki para nongmihkhmat.
U Bah Bindo u la ong ba u la ïakhun ïa ka ilekshon MDC la hynriew sien kata naduh u snem 1972 bad u la jop baroh hynriew sien na ka seng UDP kaba ha katei ka por la tip ïa ka kum ka All Party Hill Leaders’ Conference (APHLC) bad hadien kata la tip kum ka Hill People’s Union (HPU) bad hadien kata pat kum ka UDP.
U la ong ba wat la u la ong ïa ki paralok ba ka la dei ka por jong u ban shongthait noh na ka kam hynrei kitei ki paralok ki la ong ba wat u President ka Ri United States of America (USA), u Joe Biden ruh u lah don 92 snem ka rta hynrei u dang long kum u President ka Ri bad kan eh aïu ïa u ban shu long uba mihkhmat hapoh ka District Council.
“Ha nga hi marwei shimet, ngam shym treh bad ngam don jingmut ban leit shano-shano ne ban ïasyllok badno-badno ruh na ka bynta kata hynrei wat la katta ki don ki paralok kiba wan ban ai jingmut hynrei nga shu tharai ba imat, ka lah biang hi ïa nga lada nga shongthait noh ruh bad ba ngan leh noh pat da kiwei-kiwei ki bynta ha ka imlang-sahlang”, ong u Bah Bindo.
U la ïathuh ruh ba ki lah don katto-katne ngut ki paralok kiba don ha kiwei ki seng kiba la tyrwa ïa u ban wan ïakhun ïa ka ilekshon na ka seng jong ki hynrei u la ong ba um pat lah satia ban ai ktien shano-shano ruh namar um pat don ïa ka jingmut kaba skhem haduh la un ïaleh biang ïa ka ilekshon ne un shongthait noh hynrei un sa shim ïa kane ka rai kaba khadduh ha u bnai Nohprah mynta u snem.
“Ki lah don ruh katto-katne na ki paralok kiba don ha kiwei ki seng kiba la ong ba lada long kaba lah ba ngan wan bad ïaleh na ka seng jong ki hynrei ngam pat ai ktien shano-shano ruh bad ngam pat don ka jingmut kaba skhem haduh mynta ban ïaleh biang ïa ka ilekshon”, ong u Bah Bindo.
