Amlarem, Naiwieng 03
Ka Lumpyngngad SC ka la ïoh jingjop ha kaba sdang ïa ka lympung ïalehkai Super Division Football League ba la pynïaid da ka Amlarem Sub Divisional Sports Association (ASSA). Kane ka la wan urlong hadien ba la lah ban pynliem ïa ka Pamtbuh SC da 4-0 kol ha ka Sngi Saitjaiñ ha Mini Stadium Ladjaplem kaba ha Anlarem.
Ha kane ka jingïa-khun ka Lumpyngngad ka la lah ban ïalehkai bha naduh kaba sdang ha kaba ka la ïoh ban thep shi kol ha ka kylla step lyngba u Dao Syieh ha ka minit kaba 21. Une u rangïalehkai shakhmat u la pynbud biang ïa ka kol ba ar ha ka minit kaba 60 jong ka kylla miet.
Ka Lumpyngngad ka la thep biang sa ar kol lyngba u Dongmi Surong ha ka minit kaba 66 bad Benjamin Pohshna ha ka minit kaba 72. Haduh kaba kut ka jingïalehkai ka Pamtbuh kam shym la lah ban pynphai bad ka la mad ïa ka jingshah rem.
Ïa kane ka lumpung ka plie da u President ka Meghalaya Football Association (MFA) Bah Hamletson Dohling ha ka jingdonlang u Bah G.L.C Mylliem (MCS), Assistant Commissioner ka Amlarem Sub-Division, ki dkhot ka MFA ba kynthup u General Secretary Bah Sunesh Syiem, Bah Heringson Shangpliang, Bah Cliff Nongrum, Bah Freddy Kharpran, u Working President ASSA Wansuk Lamin bad ki dkhot nalor kiwei kiwei.
Ha Katei kajuh hi ka sngi ka ASSA ka la pynkup burom ruh ïa ki khynnah ïalehkai Megha -lya Youth League kiba la lah ban ïalehkai bha da kaba jam shaduh ka quarter final.
Kane ka lympung kan bteng biang ha ka 5 tarik hapdeng ka Jarain C&SC bad Dongmihsngi Mupyut ha ka por 1 baje nohphai sngi.
