Nongpoh, Naiwieng 03
Ha kawei ka jingjia aksiden kali kaba la jia ha ka step Sngi U Blei ha ka surokbah National Highway 6 ha Ri Bhoi District, ar ngut ki shijur kiba dei na ka jylla Assam, ki la khlad noh hashen hadien ka jingshah ïuh ha ka trok ha ki bynta jong ka shnong Shangbangla.
Katkum ka khubor ba la ïoh lum na ki bor pulit, la ïathuh ba katei ka jingjia, ka la jia ha ka por kumba 9:48 baje mynstep katba kitei ar ngut shijur ki dang wan kiew sha ka nongbah Shillong na Guwahati da ka arshaka (Royal Enfield Himalayan) kaba don ïa u registration number AS01-FF-3367 kaba la ñiah da u Nilutpal Dowari (23 snem) na ka shnong Sarupather No. 2, Moran, Dibrugarh, Assam bad kaba la shong hadien dei ka samla Gargee Chutia (21 snem) na Gadadhar Singha Path, Joytipur, Moranhat, Charaideo, Assam.
La ïathuh ruh ba ynda poi ha ki jaka ba khongwaiñ jong ka surokbah NH-6 ha Shangbangla, u Nilutpal Dowari u la pyrshang ban jam shakhmat ïa kawei ka trok kaba don ïa u registration number AS01-RC-0413 bad namar ka jngpynher sted kaba palat, um lah shuh ban teh lakam ïa la ka arshaka bad leit ban tynrah beit-beit ïa ka shaka dien jong ka trok kat haduh ba baroh ar ngut ki la rynsied bad rung sha khrum jong ka trok bad shah ïuh syndon haduh ba kin da khlad noh hashen.
Na ka liang jong ki bor pulit, ki la pynkit noh ïa kitei ar tylli ki metïap sha Nongpoh Civil Hospital na ka bynta ban pyndep ïa ki jingdonkam katkum ka aiñ bad ïa kitei ki kali kiba ngat ha katei ka jingjia ruh la rah noh sha thanat Nongpoh.
