Shillong, Naiwieng 03
Ka Shillong Lajong ka la long ka kynhun kaba nyngkong eh ban ïoh jaka sha ka quarter final jong ka Meghalaya State League 2024 hadien ba ka la ïoh jingjop ha ka jingïalehkai ba khatduh jong ka Group-E da kaba pynliem ïa ka Mawtari Myrdon da 4-0 kol ha ka Sngi Saitjaiñ ha Wahïajer.
Kane ka la wan urlong lyngba u Yohaan Benjamin (17), Deibormame Tongper (19 & 66) bad u Rimankhraw Kharumnuid (29) na ka bynta ban pynlong ïa katei ka lahduh jong ka MSL 2019 ban jam sha kawei pat ka wat hadien ba la ïoh 9 point na ki lai sien ïakhun jong katei ka group. Ka Mawtari Myrdon kaba la ïoh 6 point, ka dang don jingkyrmen ban jam sha ka quarter final bad ka lah ban long kum ka kynhun kaba kynsai napdeng ki kynhun ba wan ba-ar bad kane kan shong tad haduh ban da kut ka jingïalehkai group.
Ka Rymbai Skhenshynriah ka la kiew sha ka kyrdan ba hakhlieh duh jong ka Group-D ha Khliehriat hadien ba ka la jop haduh 5-0 kol ïa ka Iatyllilang Lumsehkot Raliang. Ïa kine la thep da u Hesmiki Rymbai (4 & 60), Ïaishah Bareh (61) bad u Md Aruwas Khan (75 & 82) ki la rah ïa ka kynhun jong ki sha ka kyrdan kaba nyngkong da kaba pynshong nongrim ha ka jingïapher kol haba ïa nujor bad ka lahduh barim ka Rangdajied United (+5 haduh + 2)
Ka Group-A ka dei kaba jwat tam na baroh 6 tylli, ha kaba ki 3 tylli ki kynhun kiba la don ha ki kyrdan ba shakhmat bad ki dang sah sa kawei ka wat ban ïakhun. Ka jinglah ban thep da u Jerime B. Marak (40) bad u Trainingbath M Sangma (90+1) ki la biang pura ïa ka Pinggera Doogisik ban pynliem noh ïa ka Atong Matgrik da 2-0 kol ha Tura. Te kumta ka Pinggera Doogisik bad ka Lumsohkhlur ki la kamai mar 3 poiñ, katba ka Chipakkore ka la kamai 4 poiñ.
Ka la don ka jingïakhun kaba itynnad ha ka Group-F ha kaba ka Seng Samla Mawmluh ka la wanphai ban pynliem ïa ka Patharkhmah da 5-3 kol ha Shillong. Na ka Mawmluh ki la thep da u Ksankupar Khongngain (19 & 45+1), Damutskhemlang Thabah (20) bad u Balajiedlang Lyngwa (46 & 70), katba u Banpyndap Dkhar (13), Damanbha Wahlang (47) bad u Newbirthson Sankli (50) la lah ban pynphai na ka bynta ka Patharkhmah.
Ha ka Group-C, ka Ladthad -laboh ka la khur ïa ka jingjop kaba ar hadien b aka la pynliem ïa ka Nangkiew Shaphrang Lumdieng-ngan da 2-0 kol ha Tyrsad. Ïa kine la thep da u Banteilang Shylla (25) bad u Samuel Phawa (41).
Ha ka jingïalehkai jong ka Group-B kaba la long ha Mawkyrwat, ka Khliehmawlieh ka la pynliem noh ïa ka Riangdo Youth da 3-2 kol.
