Shillong, Naiwieng 03
Hadien shisnem tam ba la lap ïa ka met ïap jong ar ngut ki samla kynthei bad shynrang na kawei ka wah hajan shnong Traw, East Khasi Hills na ka liang u Rangbah Kur Sun, Bah E.R Sun u la ong ba haduh mynta ki bahaïing bahasem ki dang sah ha ka umdum.
Haba u nonglum khubor u la ïoh ban ïakren bad u Bah Sun uba dei u Rangbah Kur Sun u la ïathuh ba na ka liang ki bahaïing bahasem ki dang sah ha ka umdum halor ka jingkhlad katei ka pyrsa kur ka Phibankyntiew Sun, 18 snem ka rta. Haba u nongthoh khubor u la pyrshang ban kylli biang halor katei ka jingsah umdum, na ka liang u Bah Sun um treh ban jubab.
Wat la na ka liang u Rangbah Kur Sun um treh ban jubab hynrei la sngewthuh ba kane ka jingkhlad jong ka Phibankyntiew la suba ba don kiba pynïap. Kumta namar ki bahaïing kim ïoh ïa ka sakhi kaba biang ki shu kut tang ha ka jingsah umdum.
Kum ban shu pynkynmaw ka Phibankyntiew Sun kaba sah ha Marbisu bad u paralok u Wanboklang Kurbah 20 snem ka rta uba na shnong Traw ki la jah na ïing ha ka 20 tarik Nailur 2023 bad la lap ïa ki ha ka 3 tarik Risaw 2023 ha kawei ka wah hajan shnong Traw.
Ïa ka Phibankyntiew Sun la pyndep ïa ka post mortem ha Civil hospital Shillong bad ïa u Wanboklang Kurbah la leh post mortem ha NEIGRIHMS Mawdiangdiang.
