Agartala, Naiwieng:
Ki bor pahara ha ki bynta khappud jong ka Tripura ki la kem ïa ar ngut ki Rohingya bad ki la kurup ruh ïa ki jingdih pynbuaid kiba shongdor haduh T. 4 lak.
Katkum ka jingpyllait khubor ba la pynmih na ki shipai BSF ka Tripura la ong ba da kaba pynshong nongrim halor ka jingïoh jingtip, ha kaba ïadei bad ka jingdon bad ka ïaid ka ïeng jong ki poiwir beaiñ ha ki thaiñ Karbook, la sdang ïa ka jingkhynra.
Ha kane ka jingkhynra, katei ka kynhun ka la buddien ïa ar ngut ki briew kiba la shah suba.
Haba la ïohbat bad khmih bniah na ki, la lap ba ki dei ki nongwan buhai shnong beaiñ bad hadien ka jingwad bniah la shem ba ki dei ki Rohingya kiba wan poiwir da ka lynti kaba beaiñ.
Kine ki briew ki la shahkem ha ka jaka sangeh bos ha Karbook kaba hap hapoh ka Gomati distrik ha ki shipai BSF jong ka BOP Bhatiabari katba ki dang thmu ban leit buhai shnong sha Bangladesh.
Ki BSF ki la ïathuh ba ym don uwei ruh na kine ki nongwan buhai shnong kiba la shah kem ki dei ki nongshong shnong jong ka jaka sah ki phetwir Rohingya kaba don ha Cox Bazar, Bangladesh. Ha kane ka jingkhynra, ki BSF ki la kurup ruh ïa ki pisa India, ki Mobile bad ki Card UNHCR.
Nalor kata, ki shipai jong ki BSF Tripura ha ki jingpyntrei kam ba bun ki la pynpulom ïa ki jingthmu khaïi tuh sha shiliang pud ha khappud Indo-Bangladesh bad ki la kurup 1,600 kilo ka shini bad kiwei kiwei ki song jong ki mar khaïi kiba shongdor da kumba T.4,76,479.
