Jowai, Naiwieng 04
Ka Nongtalang Chnongthmai, CSC Krangpam-tadong bad ka TSC Jong U Chen ki la ïoh jingjop ha ka Lower Division Football Tournament, katba ka Thangbuli YSWC ka la jop ha ka Upper Division Football Tournament ba la la pynïaid da ka Amlarem Sub-Divisional Sports Association.
Ha ka jingïakhun jong ka Lower Division ha Mini Stadium Lad Japlem kaba ha Amlarem ha ka Lah Sngi U Blei, ka Nongtalang Chnongthmai ka la jop da 1-0 kol ïa ka Amlari Model bad ïa kane la thep da u Ribales Pohtam ha ka minit kaba 36.
Ha ka jingïalehkai kaba bud, ka CSC Krangpamtadong ka la pynliem da 2-1 kol ïa ka Ïatyllilang Amsalang. U Ritikut Tariang ula thep ha ka minit 25 bad Ripaison Langsiang ha ka minit 60 na ka bynta ka Krangpamtadong, katba u Mall Lyngdoh ula thep ha ka minit 30 na ka bynta ka Ïatyllilang Amsalang.
Ha ka jingïalehkai kaba khatduh ka TSC Jong U Chen ka la pynliem noh ïa ka Ammutong Pyrshang lyngba ka shi kol ba la thep da u Eborwel Tangsang ha ka minit 22.
Haba phai sha ka jingïakhun jong ka Upper Division, ka Thangbuli YSWC ka la jop da 2-1 kol pyrshah ïa ka TSCD Moosakhia. U Wanpynbha Buam marwei u la thep ar kol ha ka minit 30 & 45 na ka bynta ka Thangbuli YSWC, katba u Wanbor Suting u la lah ban pynphai kylla ha ka minit kaba 60 na ka bynta ka Moosakhia.
