Shillong, Naiwieng 04
Ka Mawlai SC bad ka Ladthadlaboh SC ki la kylla long ki kynhun kiba la lah ban pyntikna ban jam sha ka quarter final ha ka Meghalaya State League 2024 hadien ba ki la ïoh jingjop ha ka Lah Sngi U Blei.
Ha kane ka jingïakhun ka Mawlai ka la lah ban pynjem khnap haduh 10-0 kol ïa ka Patharkhmah ha kane ka nongbah na ka bynta ban lamkhmat ha ka Group-F. Katba ka Ladthadlaboh ka la jop da 3-0 kol ïa ka Seven United ha ka Group-C kaba la long ha Tyrsad.
Da kaba pynïalehkai kham bun da ki rangïalehkai kiba dangkhynnah, ka Mawlai ka lah ban jop ha kaba u Samlang Rympei (45, 45+1, 50 & 84) u dei uba khatduh eh ban ïoh ïa ka hat-trick. Kiwei pat ki nongthep kol ki long u Balviky Marngar (22 & 26), u Arkibor Makhroh (23), u Romarius Laban (25), u Mewanshan S. Nongkseh (51) bad u Mark Gareth D Shabong (81). Kumta ka Mawlai ka la khur 9 poiñ na ki lai sien ïakhun.
Ka jingïakhun kaba la khmih lynti bha hapdeng ka Ladthadlaboh pyrshah ïa ka Seven United ka la long kaba phylla haduh katta katta, ha kaba u Sanki Langstang (38), u Banteilang Shylla (40) bad u Lammida-o Dkhar (90+2) u la thep pyrshah ïa ka kynhun na West Jaiñtia Hills. Kumta ka Ladthadlaboh ruh ka la kamai 9 poiñ na ki lai sien ïakhun.
Ha kawei pat ka jingïakhun ha Mawkyrwat, ka Khliehmawlieh kaba la wan ba ar ha u snem ba la lah, ka la pynliem ïa ka Sutnga ha ka Group-B da kaba jop da 1-0 kol bad kane ka la wan urlong lyngba u Wallambok Shangpliang (87). Wat la ka Sutnga ka la donkam ban shu pynïakhaid hadien ba ka la jop ha ki ar tylli ki jingïalehkai ba la lah, hynrei kane ka jingshah rem ka la long ka jingplie lad ïa ka Khliehmawlieh ban ïaryngkat mar 6 point bad ka Sutnga.
Ha Tura, ka Lumsohkhlur ka la jam sha ka kyrdan ba hakhlieh hadien ba ka la jop ïa ka Attong Matgrik ha ka Group-A da 2-0 kol. Ïa ka kol kaba nyngkong la kum thep hi ha ka minit kaba 13 bad kawei pat la thep da u Jestibor Mawlong (21). Te kumta ka Lumsohkhlur mynta ka la khur 6 poiñ, hynrei ka jingïakhun kaba khatduh hapdeng ka Chipakkore (4 poiñ) bad ka Pinggera Doogisik (3 poiñ) kan long ha ka sngi Balang ka ban long ka jingrai mano ban ïoh rung sha ka quarter final.
Ha ka Group-D kaba la long ha Khliehriat, ka Rangdajied United ka la jop da 8-0 kol pyrshah ïa ka Iatyllilang Lumsehkot Raliang. Ïa kine la thep da u Pasborlang Khonglikong (21 & 89), R.T Hanson Pdang (37), Balamlynti Khongjee (45), Owanijuh Pajuh (58), Freddy Banteilang Jyrwa (64), Manbhakupar Ïawphniaw (74) bad u Aenam G. Jyrwa (78). Te kumta kane ka lahduh jong ka aïom ba lah, ka la kamai 7 poiñ hynrei kan hap ban ap haduh ka jingïakhun ba khatduh hapdeng u Rymbai Skhenshynriah (4) pyrshah ïa ka Mulait United (1) ban tip mano ba wan ha khliehduh jong ka group.
Haba phai sha kawei pat ka jingïakhun ha ka Group-E, ka 7 Wasa United ka la jop da 2-0 kol ïa ka Seinbhalang Shkentalang ha Wahïajer. Ïa kine la thep da u Jeff K Rymbai (20) bad u Bannangsan Dkhar (65).
Ha ka sngi Ba-ar kan don tang kawei ka jingïakhun jong ka Group-C hapdeng ka Nangkiew Shaphrang Lumdiengngan pyrshah ïa ka Mawlum Tyrsad.
