Shillong, Naiwieng 04
Ka Nongthymmai SC ka la lah ban pyni ïa ka jingkhlaiñ bor ban pynliem ïa ka Laitkor SC da 3-1 kol na ka bynta ban ïoh jingjop ha ka OC Blue Shillong Premier League 2024 ha ka Lah Sngi U Blei ha ïalehkai SSA Stadium kaba ha First Ground, Polo.
Kane ka nam jop ka la wan urlong lyngba ka penalty ba la shut da u Ronald Singh Shaikhom (4) bad u Michaelson Kurbah (36 & 54), katba u Fridison Wanniang (38) u la lah ban pynphai na ka bynta ka Laitkor.
Ka Nongthymmai ka la ïoh jingjop nyngkong ha kane ka samoi ïalehkai da 3-0 pyrshah ïa ka Nongrim Hills SC ha ka taïew ba la dep. Katba ka Laitkor ka la jop ar sien ha ki jingïalehkai ba la dep ha shwa ba kan shah rem hynne ka sngi.
Ka jingbakla ha kaba sdang jong kane ka jingïakhun ka la pynlong ïa ka Nongthymmai ban pynkhih jar lyngba ka penalty ba la shut da u Ronald Singh. Ha ka jingshisha ka Laitkor ka la dei ban ïoh pynphai ha ka minit kaba 22, hynrei ka jingshut kaba khlaiñ bha ka la leit dei na diengkol. Hadien shiteng kynta ka Nongthymmai ka la pynbud biang ïa ka kol kaba ar lyngba u Michaelson ha kaba u rangapkol ka liang pyrshah um shym la lah ban pyllait na ka jingshah thep ha ka minit kaba 36.
Hadien ar minit ka Laitkor ka la lah ban pynphai kylla lyngba u Fridison, uba la ïoh ban pyndei da ka khlieh. Wat hapdeng ka jingrisa ka jingkynhoi jong kiba bun ki paidbah nongkyrshan hadien ba ka Laitkor ka la lah ban pynphai, hynrei tang hadien katto katne por ka la shah thep kylla lyngba u Michaelson na ka bynta ka Nongthym-mai. Kane ka long ka kol kaba 50 ba la thep ha ka OC Blue SPL 2024 bad kan dei ka kol kaba saw na ka bynta u Michaelson ha ki lai sien ïakhun bad mynta u la don ha ka jingïaknieh na ka bynta ban ïoh ïa ka nam Top Scorer.
Wat la ka Laitkor ka la pyrshang ban pynphai, hynrei haduh kaba kut kam shym la lah ban pynurlong na ka daw ka jingïalehkai bha u rangapkol ka Nongthymmai u Roni Das bad ka la mad ïa ka jingshah rem khmat ki nongkyrshan.
Kane lympung kan bteng biang ha ka sngi Balang hapdeng ka Shillong Lajong FC pyrshah ïa ka lahduh jong ka aïom ba la lah, ka Mawlai SC ha ka por 5 baje janmiet.
