Shillong, Naiwieng 04
Ka jinglong-jingman ka dang long kaba shngaiñ ha kaba ïadei bad ka jingsam bording ilektrik ha Jylla, bad na ka jingdon ka um ha pung Umïam, ka long kaba ai jingshngaiñ kumba ka long mynta.
Kumba ka long mynta, ka um ha pung Umïam ka dang dap smam, bad katkum ka jingthew ïa ka jingdon ka um ha kane ka pung kaba pynmih bording, ka pyni ba ka um ka don kumba 3,217 phut haduh ka Lah Sngi U Blei.
Ka jingdon ka um ha pung Umïam kumba ka long mynta ka ai jingshngaiñ ïa ka Meghalaya Energy Corporation Limited (MeECL) ha ka liang ka jingsam bording.
Ka pung Umïam ka dei kaba pynmih bording kumba 176 mega watt lyngba ki saw tylli ki projek bording ilektrik kiba kynthup ïa ka Umïam Stage-I(4×9=36mw), Stage-II(2×10=20mw), Stage-III (2×30=60mw) bad Stage-IV(2×30=60mw).
Ka jingpyndonkam ïa ka bording kaba pynmih da kine ki projek ka shong katkum ka jingdonkam ha kaba ki don ki sngi ba donkam tang 84mw bad ki don pat ki sngi ba ka jingpyndonkam ka kham bun.
Ka pung Umïam ka dei ruh kawei na ki jaka jngohkai kaba khring bha ïa ki nongjngohkai kiba nabar jylla bad napoh ka jylla ruh kumjuh.
Ka jingbteng ban hap slap mynta u snem ka la pynlong ïa ki jaka pynlang um ha kylleng ki jaka kynthup ïa ka pung Umïam ban dap smam ka um haduh mynta ba la poi ki bnai Tlang.
Ka jinghap slap mynta u snem ka long kaba kham bun lada ïanujor bad ka jinghap slap ha u snem 2023.
Ha kawei ka pat ka khubor, ka jinghap kynsan u slap bajur la sakhi ha ka Lah Sngi U Blei ha ki bynta jong ka Ri-Bhoi district bad kumjuh ruh ha ki bynta jong ka East Khasi Hills district kiba don shaneng jong ka pung Umïam naduh Mawlai Mawïong ter ter.
Ki jaka ba kham jur bha ka jinghap slap ha ka Lah Sngi U Blei ki kynthup ïa ka Umsning kumjuh ruh sha thaiñ Umïam ha kaba ki lynti ki syngkien bad surokbah NH-6 ki la dap da ka um slap.
