Shillong, Naiwieng 04
Ka Hynñiewtrep Integra-ted Territorial Organisa-tion (HITO) Sengkmie ha ryngkat ka HITO Ribhoi District ha ka 4 tarik Naiwieng 2024 ka la leit ban ïakynduh bad aiti da ka dorkhas ha ka shlem treikam jong u Director ka tnat Soil & Water Conservation ka Sorkar Jylla, u ZD Shira kaba don ha Lachumiere, Shillong ban pyrshah jur halor ka jingthmu jong ka Sorkar ban aiti ïa ka shlem treikam CTI kaba don ha Byrnihat na ka bynta ban shna ïa ki karkhana.
Haba kren sha ki lad pathai khubor, u Bah Shaniah Nongrum, Vice-President ka HITO Seng-kmie bad uba dei ruh u President ka HITO Ribhoi, u la ong ba ka long kaba sngewlyngngoh shi kat dei eh namar wat u Director ka tnat Soil & Water Conservation ruh um don jingtip eiei satia halor ka jingthmu jong ka Sorkar.
“Kaei kaba pynlyngngoh ïa ngi ka seng, ka long ba ngi la ïoh ka jingpyntip bad ka jingujor na kiba bun balang bad wat ki nongtrei kiba don hapoh kane ka ophis, ki la tip thikna ba ka Sorkar kan aiti noh ïa katei ka jaka kaba don ha katei ka thaiñ na ka bynta ki kam pynroi lyngba ki karkhana”, ong u Bah Nongrum.
U la ong ruh ba kane ka jingthmu jong ka Sorkar ka long ban pynjot ïa ka mei-mariang bad ka jingbuh ïa ki karkhana kan ktah ruh ïa ka koit-ka khiah jong ki paidbah kiba shong-ba sah hajan jong katei ka jaka.
“Ka jingthaw jong ka Sorkar da ki komiti bapher-bapher kaba da thung da ki Chairman ne Co-Chairman hynrei ka jingthmu jong ki shalyndet ka long ka ban pynmynsaw ïa ka mei-mariang”, ong u Bah Nongrum.
U la ong ba ki paidbah nongshong-shnong ka thaiñ Ribhoi ki la mad jingeh haduh katta-katta namar ka jingdon jong ki karkhana hapoh ka thaiñ, ka la wanrah shibun bah ki jingeh ïa ki nongshong-shnong ka thaiñ.
Ha kajuh ka por, u la ong ruh ba ym tang ba ka wanrah jingktah ïa ka mei-mariang lyngba ka jingtei ïa ki karkhana hynrei ka jingthmu jong ka Sorkar ban pynkynriah noh ïa katei ka ophis sha Shillong, kan long ka jingduhnong kaba khraw ruh ïa ki paidbah nongshong-shnong ka Ribhoi kiba ïoh kam-ïoh jam lyngba ka jingdon jong katei ka ophis.
Kumta, ka seng ka la dawa na ka Sorkar ba ka dei ban pynsangeh noh mardor ïa kane ka jingthmu. Lada kam lah ban leh kumta, na ka liang ka seng kan sa shim noh da kiwei pat ki sienjam kiba kham tyngeh.
“Lada ka Sorkar kam pynsangeh, na ka liang ka seng naduh na distrik haduh ka sengkmie, ngin sa shong pyrkhat bad ban shim pat da kiwei ki sienjam kiba kham tyngeh”, ong u Bah Nongrum.
