Shillong, Naiwieng 05
Ka Voice of the People Party (VPP) ka la ïoh ban pynbna nyngkong (first phase) ïa ki kyrteng jong 18 ngut kyrtong na ki 18 tylli ki constituency ha Khasi Hills Autonomous District Council (KHADC) bad 12 ngut ki kyrtong na ki 12 tylli ki constituency jong ka Jaiñtia Hills Autonomous District Council (JHADC) ban ïakhun ïa ka ilekshon MDC kaba ka sorkar kan sa pynbna noh shen.
Haba ïakren bad u nongaiktien ka seng VPP u Dr. Batskhem Myrboh u la pynskhem ïa kaei kaba u President ka VPP Bah Ardent Basaiawmoit u la dep kren ha jingïalang ha Umkiang, East Jaiñtia Hills District namar ha kine ki sngi ka CEC jong ka VPP ka la pynskhem ïa ki 18 ngut ki kyrtong na KHADC bad 12 ngut ki kyrtong na JHADC hadien ba ka State Election Committee ka la dep bishar bniah.
U Dr. Batskhem um pat kwah ban pynpaw ïa ki kyrteng jong ki kyrtong hynrei shen ki nongïalam ka VPP kin sa pynbna ïa ki kyrteng.
U la ïathuh ba ha kine ki taïew ban wan ka VPP kan sa pynskhem sa katto-katne ki kyrtong na ki constituency ynda ka State Election Committee ka la dep shong bishar bniah biang.
Kum ban shu pynkynmaw u Bah Ardent Basaiawmoit President ka VPP haba u ai jingkren ha Umkiang mynha ka 2 tarik mynta u bnai Naiwieng 2024, u la pyntip ba ka seng ka la dep pynskhem ïa ki 30 ngut kyrtong hadien ba ka State Election Committee ka la bishar bniah bad u la pynbna ruh ba ka Kong Deiwi Tongper ka dei kawei ka longkmie ka ban long kum ka kyrtong ban ïakhun ïa ka ilekshon MDC sha JHADC n aka seng VPP.
Wat la u Dr. Batskhem um shym la treh ban pyntip ïa ki kyrteng jong ki kyrtong hynrei katkum ki dur ba la saphriang ha rynsan social media la ïohi ba ki kyrtong kiba la dep pynskhem ki la ïoh ban shondur lang.
Ki khubor kiba la ïoh lum la ïathuh ba na KHADC ki kyrtong kiba ka VPP ka la dep pynskhem ki long na Mylliem, Sohra, Shella, Nongkrem, Mawsynram, Mawphlang, Lyngkyrdem, Sohgryngkham, Mawthadraishan, Langrin, Mawshynrut, Nongthymmai, Nongpoh, Umsning, Laban, Mawkynrew, Mairang bad san tylli ki constituency ki bym pat ïoh kyrteng.
