Shillong, Naiwieng 05
Hadien ka jingïohpdiang ïa ka jingujor ba ka don ka jingkhlong maw bad ka jingtong shyiap na ka Wah Urkaliar kaba don ha khappud Nongmensong bad Urkaliar da ka JCB bad kiwei-kiwei ki bor mashin, na ka liang ka Federation of Khasi Jaiñtia & Garo People (FKJGP) Nongmensong Circle ha ryngkat ka bor shnong jong ka Urkaliar hapoh ka jingïalam jong u Bah Samborlang Diengdoh kum u Rangbah Shnong ki la leit ban jngoh dalade ïa katei ka jaka ban lap ïa ka jingshisha halor kane.
Kumba ka long, na ka liang ka shnong ka la khang pyrshah ïa ki nongshong shong ban khlong maw ne shyiap napoh katei ka wah hynrei kaba pynlyngngoh pat ka long ba ki la don ki briew kiba leh pyrshah ïa ka jingmana jong ka shnong. Ha katei ka jingleit jngoh, la lap ba ym tang ba ka la don ka jingtih ïa ka wah hynrei ka la don ruh ka jingpynïeng ïa ka ‘pandal’ harud jong katei ka wah kaba hap sha ka bynta jong ka Urkaliar.
Nalor kane, la ïoh jingtip ruh ba ka jingpynïeng ïa ka ‘Pandal’ ka long na ka bynta ka jinglehñiam ‘Chaat Puja’ da ki jaidbynriew Bihari. Ha kum katei ka por, la wan mih kynsan u Dharmendra Anand, Treasurer ka ‘Chaat Puja Committee’ uba la ong ba ka kynhun jong u, ka dang pynkhreh ïa ka shithi ban pan jingbit na ka Dorbar Shnong bad kane ka la pynbitar shi kat dei eh ïa u Bah Samborlang uba la buh jingkylli ba balei katei ka kynhun niam kam lah ban pan jingbit shwa na ki bor shnong ha shwa ban kin jam shakhmat.
Haba kren sha ki lad pathai khubor, u Bah Samborlang u la ong ba kane ka jingleh jong kine ki briew ka long kaei-kaei ka bym ïahap satia nalor ba katei ka jaka ka dang don hapdeng ka mukotduma hapoh ka ïingkashari.
U la ong ba ïa kane ka jaka ym don ba lah ban shu wan ban shna kino-kino ki jingshna khlem da pan jingbit namar kane ka jaka ka don hapdeng ka mukotduma bad wat ki trai ri-trai muluk ruh ki dang hap ban pan jingbit na ki bor pynïaid distrik ban pyndonkam ïa katei ka madan.
Na ka liang u Bah Kitboklang Nongphlang, Vice President ka FKJGP, u la ong ba katkum ka jingïoh jingujor jong ka seng na ki paradoh-parasnam ki la ïathuh ba ki la shah khang pyrshah ban khlong maw bad shyiap na katei ka wah hynrei ynda ka seng ka wan poi ha katei ka jaka pat, ka la long pynban da kumwei.
U Bah Nongphlang u la ong ba na ka liang ka seng ka ieh ha ka jingstad jong ki bor shnong ban leh ïa kaba donkam bad na ka liang ka seng kan don ryngkat bad ka shnong haba ka shim ïa kino-kino ki sienjam ruh.
“Ngi da kyntu ba nangne shakhmat lada ki dei kiwei ki kynhun balang, ki kynhun bapher-bapher bad haduh ki bor pynïaid distrik ruh ba kam dei ban ïuhroit ïa ka hok jong ka Dorbar Shnong hynrei ki dei ban ïaid ryngkat bad ka jingïoh jingbit”, ong u Bah Nongphlang.
Shuh-shuh u Bah Nongphlang u la pynrem jur ruh ïa ki bor pynïaid ka distrik ba kim dei ban leh klet ïa ka bor shnong bad ban kynmaw pat ïa ki tang ha ka por ba don ka jingïakhih ki seng.
“Katba ynda la dei ka jingmyntoi jongno-re-jongno pat, ki leh klet ïa ki Dorbar Shnong bad lehse, ïa ki NOC ki bym dei ban ai ruh, ki ai pathar”, bynrap u Bah Nongphlang.
