Shillong, Naiwieng 05
U Lat ka Jylla u CH Vijayashankar ha ka Sngi Ba-ar u la khot ïa ka jingïalang bad ki ophisar na ka PWD, NHAI bad NHIDCL ban ïakren halor ka jingïaid shaphrang jong ki jingtei ha ka jylla. Ha kane ka jingïalang la ïadon lang u Bah Barilang W Phira uba dei u Secretary Transport jong ka Sorkar Jylla ha ryngkat u S Choudhary uba dei u Director ka National Highways Authority of India (NHAI), bad u Bijau Patir uba dei u Director ka National Highways and Infrastructure Development Corporation Ltd nalor kiwei kiwei ki ophisar.
Ha kane ka jingïakynduh, ka kynhun ka la ïakren ïa ki katto-katne ki mat kiba kongsan kiba ïadei bad ka jingpynroi ïa ki jingtei jong ka jylla. Ki jingïakren ki long halor ka jingmaramot bad jingshna ïa ki surok bah, ka jingpynbha ïa ki lad pynbiang um, bad ki buit ban pynbha ïa ka jingpynïasoh ha kylleng ka jylla, kaba long kaba kongsan na ka bynta ka roi ka par ha ka imlang-sahlang jong ka jylla Meghalaya.
U Lat u la ban jur ïa ka jingdonkam ban don ka jingïatreilang hapdeng ki tnat treikam jong ka jylla bad ka Sorkar Pdeng ban pynthikna ïa ka jingpyntreikam ha ka por kaba biang ïa ki projek ki ban ai jingmyntoi ïa ki paidbah ka jylla Meghalaya. U la ïakren halor ki jingpyrshang ba dang ïaid shakhmat na ka bynta ka Pradhan Mantri Gram Sadak Yojana, ka kyrdan jong ki surok rit kiba hap hapoh ka PWD, bad ïakren ruh shaphang ka Alternative By-pass na ka bynta ka Shillong kaba pynïasoh ïa kiwei pat ki District ban lait na ka jingdheng kali.
U la ban jur ruh halor ka jingpynheh/pynbha ïa ki surok kiba la don lypa sha ka National highway. U Lat u la ïakren shaphang ka jinglong-jingman jong ka umbam umdih, ki Street Light, surok bad nala ha ka New Shillong.
Na ka liang ki nongmihkhmat na ka PWD, NHAI bad NHIDCL ki la pynthikna ïa u Lat ïa ka jingkular jong ki ban pynsted ïa ki projek kiba dang ïaid bad ban weng ïa kino-kino ki jingeh ha ka jingïatreilang bad ka Sorkar Jylla. Ka jingleit jngoh ka la pynpaw ïa ka jingpyrshang jong ka Sorkar ban pynbha ïa ki jingtei jong ka Meghalaya na ka bynta ka jingroi kaba neh bad ka jingpynïasoh.
