Shillong, Naiwieng 05
Ka Nangkiew Shaphrang Lum-diengngan ka la ïoh jingjop kaba nyngkong ha ka Meghalaya State League 2024 hadien ba ka la lah ban pynliem noh da 3-1 kol ïa ka Mawlum Tyrsad ha ka Group-C ha ka Sngi Ba-ar ha Tyrsad.
Kane ka nam jop ka la wan urlong lyngba ki kol ba la thep da u Kitboklang Sohtun (6 & 64) bad u Pynkupborlang Kharbhih (58), katba na ka Mawlum Tyrsad la thep da u Banshem Khongsit (4′).
Ha kane ka sngi la lah ban pynlong tang kawei ka jingïalehkai. Ka Lumdiengngan lyngba kane jingjop ka la kiew sha ka kyrdan ba-ar ban ïaryngkat mar 3 point bad ka Seven United, hynrei ka la tam da ka jingïapher kol (0 la -2). Kumta kine ki kynhun kin ïakynduh ha ka Sngi Palei kaba long ka jingïalehkai kaba khatduh jong kane ka group na ka bynta ban ïaknieh rung sha ka quartfer final.
Ha kane ka samoi ïalehkai jong ka MSL, kawei-pa-kawei ka kynhun kaba wan ha ki kyrdan ba ha khlieh na ki hynriew tylli ki group lem bad ar tylli ki kynhun kiba kynsai kiba wan ha ka kyrdan ba-ar kin ïoh rung sha ka quarter final. Haduh mynta ki don tang lai tylli ki kynhun kiba la lah ban pyntikna, kita ka Ladthadlaboh na ka Group-C, Shillong Lajong na ka Group-E bad ka Mawlai na ka Group-F.
Ym tang kine ki kynhun, hynrei kiwei pat na lai tylli ki group ki dang don hapdeng ka jingïaknieh lem bad kiwei pat ar tylli kiba kynsai ki ban wan ha ki kyrdan ba-ar.
Kin don saw tylli ki jingïalehkai ha ka Sngi Balang, ha kaba kawei pa kawei kan long kaba khatduh ha la ka jong ka jong ka kynhun. Namar ba ka dei ka jingïalehkai kaba khatduh ha Tura, ka Pinggera Doogisik kan ïakhun pyrshah ïa ka Chipakkore ha ka por 5:30 janmiet ha PA Sangma. Ka Chipakkore (mynta kaba don 4 poiñ) ka don ka lad ban kiew sha ka kyrdan ba ha khlieh duh jong ka Group-A lada kan jop. Ka Lumsohkhlur ka don ha ka kyrdan ba ha khlieh duh ha kane ka por da kaba kamai 6 point, katba ka Pinggera Doogisik ka don 3 point.
Ha ka Group-B, ki don ar tylli ki kynhun kiba kamai mar 6 poiñ – ka Khliehmawlieh bad ka Sutnga. Watla kine kiba hadien ki don ïa ka jingïapher kol kaba kham bha (+6 haduh +1), hynrei ka Khliehmaw-lieh ka don ïa ka jingïakhun kaba kham eh. Bad lada ka Mawten (3 poiñ) kan jop ha ka Sngi Balang pyrshah ïa ka Riangdo Youth, kan ïasoh lang ban kamai mar 6 point bad kiwei ki ar ki kynhun.
Ha Khliehriat, ka Rymbai Skhenshynriah ka donkam ban jop da 6 kol pyrshah ïa ka Mulait United ban tam ïa ka Rangdajied United kaba dang lamkhmat ha ka Group-D. Ka Rangdajied bad ka Rymbai Skhenshynriah ki la ïakhaid khlem don ba thep kol bad ka RUFC ka la kamai 7 point bad ka Rymbai Skhenshynriah ka la kamai 4 point.
Ha Shillong, ka Pynursla United kan ïakhun pyrshah ïa ka Seng Samla Mawmluh. Kine kynhun ki la mar 3 point, hynrei ka Pynursla ka la tam da ka jingïapher kol. Wat la ki lah ban ïoh ïa ka jingjop hynrei kin ym lah ban rung sha ka quarter final.
