Shillong, Naiwieng 05
Da ka jingthmu ban wanrah ka jingïajan bad ki paidbah nongkyrshan ba kin long kum ki dkhot jong ka klob, ka Shillong Lajong Football Club ka la pynbna ba ka la pyllait ïa ka Membership Program bathymmai na ka bynta ka lympung ïalehkai I-League 2024-25.
Ka jingthmu jong kane ka long ban wanrah ka jingïajan na ka bynta ki jingïalehkai jong ka klob da kaba tyrwa ïa ki jingmyntoi ba kyrpang bad ki lad kiba kyrpang kiba ïadon bad ki jingdonkam jong kane ka klob ba paw ka nongbah.
Ïa kane ka lympung ïalehkai I-League 2024-25 ban pynïaid da ka All India Football Federation (AIFF) naduh 22 tarik mynta u bnai bad ka Shillong Lajong kan ïakhun nyngkong ha la ïing pyrshah ïa ka Churchill Brothers ha ka 24 tarik.
Haba pynpaw ha ki lad pathai khubor ha ka Sngi Ba-ar, u Adviser bad uba long u nongai-ktien ka SLFC u Bah Seibor Sana u la pynpaw ba ha kane ka kynti kaba mynta kane ka klob na ka nongbah ka la wanrah ka jingïajan bad ki nongkyrshan ba kin long kum ki dkhot jong ka klob da kaba wanrah ïa ka Membership Program na ka bynta kane ka samoi ïalehkai.
“Kane ka jinglong dkhot ha ka klob kan long haduh lai tylli da kaba siew ïa ka bai long dkhot (membership fees) kaba kynthup ïa ka Gold, Silver bad ka Bronze. Kane ka Gold ka long T. 3500, Silver ka long T. 2500 bad ka Bronze Membership Card ka long T. 1500 tyngka.”
“Ha kane ka Gold Membership Card ka klob ka lah ban ai kawei ka Jersey jong ka klob, ka scarf, tupia bad u keychain ryngkat kawei ka tiket ha manla ki jingïalehkai I-league ha kaba ki lah ban ïoh shiteng dor tang na ka bynta kawei ka tiket. Kumjuh ha ka Silver Membership Card ki nongkyrshan jong ka klob kin ïoh ïa ka replica jersey, scarf bad keychain ryngkat ki tiket ha manla ki jingïalehkai ha kaba ki lah ban ïoh shiteng dor ïa ka bai tiket kaba naduh 150 haduh 300 tyngka. Katba ka Bronze Membership Card, ki nongkyrshan kin ïoh ïa ka replica jersey, scarf bad u keychain ha kaba kin ïoh shiteng dor ïa ka bai tiket kaba naduh 150 haduh 200 tyngka na ka bynta kawei ka jingïalehkai jong kane ka klob.”
Na ka liang u CEO ka Shillong Lajong, Bah Habamutlang Lyngdoh, u la pyntip ba ki nongkyrshan ki lah ban pynrung kyrteng ïalade na ka bynta ka Membership Program jong ka klob lyngba ki social media jong ka SLFC lyngba ka Instagram bad facebook mynta ka sngi. Ki nongkyrshan ki lah ruh ban leit sha ka ophis jong ka klob kaba don ha Hotel Centre Point ha Khyndailad, Shillong.
