Khliehriat, Naiwieng 05
Ka Diengshyn-rum SC bad Rangad SCSC ki la ïoh jingjop ha ka lympung ïalehkai First Division Foot-ball Tournament 2024 ba la pynïaid da ka East Jaiñtia Hills District Football Association (EJHDFA) ha madan Artificial Turf Diengshynrum, Khliehriat ha ka Sngi Ba-ar.
Ha ka jingïakhun, ka Diengshynrum SC ka la pynliem ïa ka R. Synrang Shahkhain SC da 4-0 kol. Ha kane ka jingïakhun ki rangïalehkai ka Diengshynrum ki la lah ban pynpaw ïa ka jingtbit ha ka rukom ïalehkai ha kaba ïa ka kol kaba nyngkong la thep ha ka kylla step lyngba u Kitbor Rymbai ha ka minit ba 34.
Katei ka kynhun ka la thep biang saw lai kol ha ka kylla miet lyngba u Lekijuh Dkhar ha ka minit kaba 51, kumjuh u Rumi Lyngdoh (56) bad u Bewithus Sympli (77) na ka bynta ban khur syndon ïa ka jingjop.
Haba phai sha kawei pat ka jingïalehkai kaba bud, ka Rangad SCSC ka la jop da 3-2 kol ïa ka Khliehriat West FC. Ïa ki kol jong ka Rangad la thep da u Daniel Lamo ha ka minit ba 19 & 45+1 bad u Jerry Lyngdoh (83). Katba na ka Khliehriat West la thep da u Fourningstar Dkhar ha ka minit 48 bad Silgrak Pala (87) hashwa ban kan mad ïa ka jingshah rem.
Da kane ka nam jop ka Diengshynrum ka la ïoh rung sha ka quarter final.
Ka jingïalehkai ha ka 7 tarik (Sngi Palei) hapdeng ka R. Wahshnong SC bad ka Mukhaïalong SC ha ka por 11 baje mynstep bad ka Pamrakmai SCSC ïa ka Bataw YWSC ha ka por 1:30 nohphai sngi.
