Nongstoiñ, Naiwieng 06
Ka JAC ki Lai Polling Station ka la ïoh ban shong pyrkhat kyrkieh ha ka shnong Langdongdai ha West Khasi Hills ban ïakren bad ïatai sani halor ka jingpynbna ha ka 2 tarik u bnai Naiwieng 2024 ha ka jingïalang paidbah ha Mawsmai halor ka jingleit dih sha bad bam ja da ka jingleit rah placard hakhmat ka shlem treikam KHADC ka ban long ha ka 9 tarik u Naiwieng 2024, ha kaba da kawei ka jingmut ki la shim biang ïa ka rai ba namar ki daw ki bym lah kiar la pynkynriah noh na katei ka tarik sha ka 13 tarik u bnai Naiwieng 2024.
Ka kyrwoh lyngba u Vice Chairman, Bah Ederly Sohlamar u la ong ba namar ka jingïatyngkhuh kam bad ki kam bym lah kiar la ïoh bad shim rai lang ban pynkynriah na ka 09/11/2024 sha ka 13/11/2024.
Shuh shuh u la ong ruh, “Ngi shim ïa kane ka lad bad ka kabu ban pyntip sha baroh ki paidbah nongshong shnong jong 21 tylli ki shnong, ki kynhun seng ha ka Ri-Khasi, ki lok ki jor kiba don ka mynsiem ban wan kyrshan bad snohkti lang ban ïa don lang bad ngi ha katei ka sngi”.
Ka kyrwoh khubor na ki nongkitkam ka JAC ka ong bad pynpaw ruh da kaba ong, “Ngi la buh ka por lada na ka liang ka KHADC kam ai jubab, na ka liang jong ngi, ngi la rai ban ïaid rally ryngkat ki placard naduh Umshyrpi haduh ban poi shaduh ka phalor jong ka KHADC”.
U Secretary ka JAC u Bah Arful Mangsang ha ka kyrwoh khubor u la ong ba ka JAC ki Lai Polling, ki la ïaleh ïa kane namar ka jingpynkynriah jubor khlem ka jingmonlang jong ki paidbah nongshong shnong na Mawshynrut Konstitwensi sha Rambrai Konstitwensi ïa ki lai tylli ki polling station kiba kynthup ïa ki 21 tylli shnong.
U la ong shuh shuh ba na ka liang ka JAC ryngkat ka sur ki paidbah ki la pyrshang ban pynsngew lyngba ki jingthoh da kaba wan ban ïakynduh markhmat bad u Bah PN Syiem ha shlem treikam uba dei u Chairman jong ka Select Committee bad ïa u Bah Pynïaid Sing Syiem, CEM ka KHADC. La ong ruh ba na ka liang u Bah PN Syiem u la kular ban shimkhia ban ai jubab hynrei haduh mynta u khlem ai ïa ka jubab kaba shai kumba la dawa. Namar na kane ka daw la shim ïa ka rai ban ïaid kjat bad ïaid rally bad lada kin dang sngap mynthi kin sa shong kyllaiñ mungor syndon ha phalor ka KHADC ha katei ka sngi.
Na ka liang ka JAC, ki paidbah na 21 tylli ki shnong jong lai tylli ki polling station ki khot bad wer ïa ki paidbah, ki seng bad kiba don ka mynsiem kyrshan ban snohkti lang ban ïa don lang ha katei ka sngi.
