Shillong, Naiwieng 07
Ka long ka khubor kaba sngewsih ïa i Kong Kmoiñ Wahlang bad Kong Wandashisha Dewkhaid kiba la duh noh ïa ka lad ban leit shim bynta sha ka jingïakob mareh ba la tip kum ka 13th Pan Pacific Masters Games 2024 ka ban long ha Australia na ka daw ba kim shym la ïoh visa.
Ïa kane jingïakob la buh ba kan long ha ka Sngi Thohdieng ha Gold Coast Queensland kaba ha Australia.
Kat kum ki khubor la ïathuh ba kitei ar ngut ryngkat bad u Bah Biningstar Lyngkhoi uba la thmu ban leit synran lang ïa ki, kim shym la ïoh visa na ka daw ka jingbym shim khia da ka synjuk ïalehkai jong ka ri kata ka Pan India Masters Games Federation.
Ha ka jingshisha na ka liang ka tnat ïalehkai jong ka Sorkar Jylla ka la ai ka jingkyrshan pura ïa kitei ar ngut ki nongmareh naduh ka jinglut-jingsep bad kumjuh ha ka liang ka jingai jinghikai namar ka dei ka sien kaba nyngkong eh ba kin ïoh ïa ka lad ban leit shim bynta shabar ri.
Haba pyrshang ban ïakren bad u nongthoh khubor, u Bah Biningstar uba long u khlur nongmareh barim ka Jylla, u la pynpaw ba kane ka jingduh leit shim bynta ka dei na ka daw ka jingbym shim khia ka Pan India Masters Games Federa-tion. “Ha ka jingshisha ngi la dep ban phah lut ïa ki kot ki sla sha ka Pan India Masters Games Federa-tion naduh u Nailar, hynrei kane ka synjuk ka la sngap jar-jar khlem da ai jingtip sha ngi ha ka por kaba biang bad dei tat haduh ba ngin da leit sha nongbah Delhi ba ngi la sngewkyndit ba ngi la shah kyntait noh namar ka jingbym biang ha ki jingdonkam.”
“Kum u coach nga sngewbynnud eh namar ka dei ka sien kaba nyngkong eh ïa i Meiieit Kmoiñ bad i Kong Wandashisha ba kin leit shim bynta shabar ri. Nga kyrmen ba kine ar ngut kin ïoh pat ïa ka lad ban leit shim bynta sha ka World Masters Games ka ban long ha snem ban wan,” u la bynrap.
Ha kawei pat ka liang u District Sports Officer (DSO), South West Khasi Hills District, Bah Damang Syngkon u la ïathuh ba kane ka jingduh leit shim bynta jong kitei ar ngut ki longkmie ka dei hadien ba ka shlem treikam ka ïing kit ktien syiem (consulate) jong ka ri Australia, ka lap bad shem ba don ki jingduna ha ka liang ki kot ki sla, nangta ha ka por ba shim ‘interview’ ruh imat kim lah bha ban ai ïa ka jubab kaba biang.
Ki khubor ki ïathuh ruh ba kane ka jingduh kam dei satia tang ïa ka jong i Kong Kmoiñ bad Kong Wandashisha, pynban la ïoh jingtip ba napdeng ki 40 ngut, bun bah kiba la duh ban leit shim bynta sha katei ka jingïakob.
Namar kata, kitei ar ngut ki longkmie lem bad u Bah Bining kin hap wanphai noh na ka nongbah Delhi sha kane ka nongbah ha ka Sngi Thohdieng.
Lah ban pynkynmaw ba i Kong Kmoiñ i long i ba la tymmen tam napoh ka Jylla ban ïashim bynta ha kiba bun ki jingïakob mareh la ka long hapoh ka jylla ne wat ha kylleng jong ka ri. Lyngba ka jinglah ban ïalehkai bha ha kawei na ka jingïakob napdeng ki nongshim bynta kiba ha ka rta kaba 75 snem shaneng kaba long ha Hyderabad mynta u snem, i la shah khot ha ka Pan India Masters Games Federation ban leit shim bynta sha Australia.
