Ha India, ka telecom ka pynïasoh ïa ki briew bad ka long kaba kongsan ruh ha ka jingkyntiew ïa kito kiba sah ha ki jaka ba dang duna ka roi ka par. Ha kine ki shiphew snem ba la dep, ka ri ka la sakhi ïa ka jingkiew ka jingïasoh lyngba ki lad digital. Ka bai data ha India ka long kawei na kaba jemdor tam ha ka pyrthei bad ka India ka don palat 95.40 million ngut ki briew kiba pyndonkam ïa ka internet, bad na kine, 398.35 ngut ki dei kiba sah ha ki jaka nongkyndong. Ha kine ki shiphew snem ba la dep, ki broadband connection ki la kiew na ka 64 million sha ka 924 million. Kane ka jingpynïasoh kaba ïar ka la wanrah ïa ka ioh ka kot digital kaba don ka bynta kaba 10% jong baroh ki kam ka ioh ka kot jong ngi mynta, bad la antad ba kane kan kiew sha ka shi pawa jong ka Gross Domestic Product (GDP) shuwa usnem 2026. Ki jingai jingshakri ki bank, ka jingpynshisha KYC, ki jingsiew digital, ki jingpynshisha lyngba ki mobile ki la long u budlum jong ka jingkylla ka India ha ki kam digital, kiba plie lad ïa ka jing-ai jingshakri Jan Dhan, Aadhaar, Mobile (JAM) ba kin seisoh bha. Ha u Risaw, ka India ka la don 126 tylli ki jing-ai jingsiew digital ha ka rynsan Aadhaar Enabled Payment.
Hynrei, kane ka jingkylla ha ki kam digital ka wanrah ruh ïa ki jingeh khamtam ka jingïada ïa ki briew na ki jingma kiba wan bad ka jingkiew shaphrang ha ki kam teknoloji. Ki mar kiba wanrah ïa ka jingsuk, ki mar ba ngi bat ha ki kti jong ngi ki la wanrah ruh ïa ki jingma jong ki kam cyber beaiñ kum ki jingphonethok, ki message thok, ki jingtyrwa tiar na ki kompani, ki jingthokphising, ki jingbei tyngka thok bad ki lad ban ioh shim ram.
Kawei ka jingeh ka long kaba kham kongsan, ki jing-thok ‘Kem Digital’ ki dang roi bha mynta. Ka rukom treikam ka long ba ki nongthok ki leh mynleh ban dei ki ophisar sorkar bad ki pyntieng ïa ki briew bad dawa pisa na ki. Ha ryngkat ka jingduhpisa, kine ki kam thok ki ktah ïa ka kamai kajih, ka jingshaniah bad ki ktah bha ruh ïa ka jingshngain ba ki briew ki donkam ban pynïasoh ïalade ha ka ioh ka kot digital.
Hynrei, ki bor ba dei peit ki la trei mardor bad ki la pynduh ïa ki mobile connection ba la shim da kaba thok bad ki ïada ïa palat T 2,400 klur lyngba 7.6 lak ki jingujor, kaba pyni ruh ïa ka jingïada ïa ki jingim bad ki jingthmu jong ki briew.
Katba ngi dang pynkhlaiñ ïa ki jingïada jong ngi ha ki kam digital, kane kan ym urlong khlem ka jingïatreilang jong ki briew. Ka jingkyntu kaba dang shen jong u Myntri Rangbah Duh, Narendra Modi ia ki briew ha kaba u la ong “Ruko, Socho Aur Action Lo” ka pyni ïa ki jingma ba dang kham bun kiba don ha ka internet. Kane ka jingkyntu ka dei namar ka jingkiew ki kam cyber beaiñ bad ka dei ruh ka jingkyntu ban don ka imlang sahlang kaba peitngor bad kaba la pynkhreh lypa ïalade. Ha ka prokram Mann ki Baat ba dang shu dep, u Myntri Rangbah Duh u la ban jur halor ka jingdonkam ban ai jingtip shaphang ki kam ba ym shaniah lyngba ka helpline 1930 bad ka rynsan cybercrime.gov.in. Ka jingban jur halor ka jingïashim bynta ki paidbah ka long kaba donkam bha ban ïaleh pyrshah ïa ki nongthok kiba pyndonkam ïa ka internet.
Hynrei katba ki nongthok kiba pyndonkam ïa ka internet ki dang pynkylla ïa ki rukom treikam jong ki, ki la sdang pyndonkam ïa ka jingphone na kiwei kiwei ki ri lyngba ki number kiba i kumba ki dei na India (+91-xxxxxxxxxx). Kane ka jingpynkylla ïa ka calling line identity (CLI) ka plie lad ïa ki ba kin leh kumba dei ki jingphone napoh ka ri bad kane ka kham pynsuk ïa kiba kin thok ïa ki briew.
Ka tnad telecommunications ka la leh ïa kaba donkam da kaba sdang ïa ka International Incoming Spoofed Calls Prevention System. Kane ka la khang lad bha ïa kine ki nongthok ha kaba ka la block 86% ki jingphone thok- kaba long kumba 1.35 klur tylli ha ka shi sngi.
Ka bynta kaba kongsan jong ka jingthmu jong ngi ban don ka India kaba shngain ha ki kam digital ka long ka jingpynkupbor ïa ki briew jong ka ri ha ki kam digital. Ka rynsan Sanchar Saathi ka dei ka dak jong kane ka kam kaba don ki atiar kum ka Chakshukaba plie lad ïa ki briew ba kin ai jingtip shaphang ki message, ki jingphone, ki kam whatsapp bym shaniah. Da kaba pyndonkam ïa ka bor jong ka Artificial Intelligence, ka tnad ka la lap bad pynsangeh palat 2.29 lak tylli ki mobile, ka la pynsangeh ïa 71,000 ngut ki nongdie bad la buh jing-ujor pyrshah 1,900 ngut ki riewsniew lyngba ki Telecom Service Provider (TSP).
Namar ka jingdon ki briew jong ka ri kiba dang samla bad kiba sngewthuh bha ïa ka teknoloji, ngi la ai bynta ruh ïa ki khynnah pule ha ka kam. Ki samla ba dang pule ha ki kolej ha kylleng ka India ki la wan shakhmat kum ki nongtrei mon sngewbha Sanchar Mitra, ha kaba ki ai jingtip ïa ka imlang sahlang shaphang ka jingshngain ha ki kam digital lyngba ka rynsan Sanchar Saathi. Kine ki samla ki ïarap ïa ki briew ba kin pyndonkam ïa ki atiar kiba don ban ïada na ki kam thok lyngba ka telecom. Naduh ba la sdang ïa kane ka kam ha u Jymmang 2023, ka rynsan Sanchar Saathi ka la jam shaphrang, ha kaba la don 7.7 klur ki briew kiba la pyndonkam ïa ka, kaba long kumba ar lak ki nongpyndonkam ha ka shi sngi. Kane ka rynsan ka la don ruh ka bynta kaba heh ban wad ïa 12.59 lak tylli ki mobile ba la jah. Ka la long ka atiar kaba khlaiñ ïa ki briew kiba ïeng skhem na ka bynta ka jingïada ïa ki kam digital, kaba la pynkhlaiñ ïa ka jingsngewthuh ba ka jingïada ha ki kam cyber ka dei ka jingbahkhlieh jong baroh.
Khnang ban ïaleh pyrshah ïa ki jingphone thok, ki SMS bym donkam bad ki jingtyrwa tiar da ki kompani, ka Telecom Regulatory Authority of India (TRAI) ka la pyntreikam ïa ki sienjam ban ïada ïa ki briew. Ka jingpynkheiñ ïa ki kyndon ka wanrah ïa ki jingdainkuna, kaba pyni ïa ka jingleh tyngeh pyrshah ïa ka jingpynkheiñ ïa ka jingshngain ha ki kam digital. Haduh mynta, ka TRAI ka la pynsangeh 800 tylli ki kynhun bad ki briew shimet kiba ju phone ban ai jingtyrwa, bad la pynsangeh palat 1.8 million tylli ki nombar. Kane ka treikam ruh ïa ki SMS thok, ha kaba 350,000 tylli ki message bad 1.2 million tylli ki content template ki dei kiba la shah pynsangeh.
Ka bynta kaba kongsan jong ka jingïada ha ki kam digital jong ngi ka dei ka Digital Intelligence Platform (DIP), kaba pynïasoh ïa 520 tylli ki kynhun kiba ïadei bad kane ka kam, ba kynthup ïa ki 460 tylli ki bank bad ki kynhun kiba ïadei bad ka jingpyntreikam ïa ka aiñ. Kane ka jingïatreilang ka plie lad ïa ka jingai jingtip mardor bad ka jingshim ïa ki sienjam pyrshah ïa ki jingma ha ki kam cyber.
Ha kane ka juk digital ba sted ka jingkylla, ka jingpeit bniah ïa ka jingshngain ha ki kam cyber ka dei ka jingïada bad ka long ruh kaba kongsan ban ïada ïa ka lawei digital jong ka ri. Lyngba ki jingdon jingem kiba khlaiñ ha ki kam digital, ki samla kiba sngewthuhbha ïa ki kam teknikal bad ki rukom treikam kiba khlaiñ, ka India ka la kyntiew ïalade sha ka nongïalam ha ki kam digital. Katba ngi dang ïaid ha kane ka lynti kaba bun ki bynta, ka jingïeng skhem jong ngi ban pynbha shuh shuh bad pynkylla ïa ki rukom treikam ka long kaba skhem.Da kaba sngap ïa ki jingkyntu jong u Myntri Rangbah Duh, ngi lah ban tei ïa ka India kaba shngain ha ki kam digital – ha kaba baroh ki briew jong ka ri ki ioh jingïada, ki ioh ïa ka jingpynkupbor bad ki long kiba khreh ban kiewshaphrang ha kane ka juk digital.
Da u Jyotiraditya M. Scindia
U Jyotiraditya Scindia u dei u Myntri Sorkar Pdeng ba dei khmih ïa ki tnad communications bad development of northeastern region. PIB
