Aizawl, Naiwieng:
Ka Manipur Pradesh Congress Committee (MPCC) ka la ther tyngeh ïa u Myntri Rangbah jong ka Mizoram u Lalduhoma, halor ki jingkren ba dang shen jong u, kiba ïasaid na ka bynta ban pynïatylli ïa ki jaitbynriew Kuki ha kylleng ka ri India, Myanmar, bad Bangladesh. Ha ka jingai jingkren sha ki nongthoh khubor ha Congress Bhawan, u Hareshwar Goshwami, uba long u heh nongaiktien jong ka Manipur Pradesh Congress Committee (MPCC) u la pynrem ïa kitei ki jingkren kum ki jingkren kiba pynpait bad kiba buh jingma ïa ka jingïatylli bad jinglong ryntih jong ka ri India.
U Goshwami u la kynnoh ba ka jinglong jong u Lalduhoma ka pynthut ïa ka jing-long kawei jong ka India, da kaba buh jingkylli ïa ki jingthmu kiba don shadien ban kyntiew ïa ka jingïatylli hapdeng ki jaitbynriew Kuki ha kylleng sawdong jong ka pyrthei. “Kum kine ki jingkren ki buh jingma ïa ka jingkular jong ngi ban ïoh ïa ka India kaba ïatylli,” u la ong, ha kaba u la kyntu ïa ka sorkar ba kan shim ka jingtuklar halor kane. U nongaiktien ka Congress u la ban jur da kaba ong ba ïa ka jingktah kaba lah ban mih na kum kine ki jingkren, da kaba dawa ïa ka jubab na ki bor synshar jylla bad jong ka sorkar kmie ban weng noh kloi ïa kane ka mat. Ka jingïakynad, ka mih na ki jingkren, kiba la ïathuh ba u Lalduhoma, u la kren ha ka 4 tarik Nailur, 2024, ha ka jingïalang jong ki riewlum Kuki ha America.
U Myntri Rangbah jong ka Mizoram u la pynpaw ïa ka jingkyrshan ban pynïasohlang ïa ki jaitbynriew Kuki hapoh kawei ka jingïalam bad ka jaitbynriew, da kaba kynnoh ba la “phiah khlem akor ïa ki hapoh lai tylli ki sorkar bapher bapher.” Kane ka jingsngew, kaba la kyrshan hadien da ka Department of Information and Public Relations, ka la pynmih ïa ki jingsngewkhia shaphang ka jingktah ïa ka shongsuk- shongsaiñ ha ka thaiñ bad ka jingïatylli jong ka ri. U Goshwami u la pynrem ïa kitei ki jingkren kum kiba “pynsngewsih” bad pynïapra, da kaba ïanujor ïa ki bad ki jingkren ba la kynnoh da ka Myntri Rangbahduh barim ka Bangladesh, ka Sheikh Hasina, kaba la kynnoh ba ka ïasaid na ka bynta ka jaitbynriew Kuki kaba kham bun ki Khristan kaba kyrpang. “Kane ka ïai pyrshah ïa baroh kaba ngi ïeng kum ka ri kaba ïatylli hapoh ka synshar paidbah kaba don ha ka ïingdorbar thawaiñ,” u la pynpaw.
U nongïalam ka seng Congress u la buh jingkylli balei ka sorkar kmie bad ka sorkar jylla ba la ïalam da ka seng BJP kim shym la shimkhia eiei ban jubab ei ei halor kane. “Hato kane ka dei ka jingpyrshang kaba thmu ban pynïapher shuh shuh ïa ki briew ha kane ka jaka them?” u la kylli, da kaba dawa ban tuklar mardor na ka sorkar. U Goshwami u la kyntu ïa ka jinglong kaba ïatylli pyrshah ïa ki jingkren pynïapher jingmut, da kaba pynksan ïa ka jingdonkam ban ïada ïa ka imlang-sahlang jong ka ri India.
