Shillong, Naiwieng 07
Hadien 48 kynta ka jingïakhih da kaba shong shah thngan ba khlem buh por ha phyllaw ba don hakhmat ka khyrdop ka ophis treikam u Vice-Chancellor ka skulbah NEHU, u Prof. Prabha Shankar Shukla, lai ngut ki samla pule ki la poi hospital namar ka jingkem tlot ka met ka phad bad ha kaba ki la don ruh katto-katne ki samla kiba la shah ai ‘IV drip’ ha ki doktor kiba la wan ban peit bad khmih ïa ka koit ka khiah jong kitei ki samla kiba la shong ïakhih ha katei ka jaka.
Kum ban shu kdew, ki samla pule ki la pynlong da ka jingshong shah thngan naduh ka por 1 baje nohphai sngi jong ka 5 tarik u Naiwieng 2024 ban dawa hiar shuki mardor ïa u Vice-Chancellor (VC) ka NEHU u Prof. Prabha Shankar Shukla hadien ka jingdonkti jong u ban thung kam beaiñ ïa u Registrar, Deputy Registrar bad kiwei ki ophisar bad dawa ruh ba u dei ban weng kam mardor ïa ki lym kumta kin ïai bteng ïa ka jingïakhih jong ki nalor ka jingmih ki jingkynnoh pyrshah ïa u ba u dei u VC uba isih ïa ki trai Ri-trai muluk bad kumjuh halor ka jingbym treh thung kam ïa ki Pro-Vice Chancellor ha Shillong bad Tura NEHU Campus da ki trai muluk-trai jaka nalor ki kiwei-kiwei.
Hadien kane ka jingshong shah thngan ba khlem buh por ki samla pule NEHU, ha ka miet Sngi Palei lai ngut ki samla ki la tlot palat bad la hap ban pynkit noh sha ka jaka ai jingsumar. Ar ngut napdeng kine ki long u samla Toniho Kharsati (GS NEHUSU) bad u Samla Aiboklang Nongsteng (Organising Secretary, KSU NEHU Unit) ki la shah pynkit noh sha Civil Hospital, Shillong. Kine ki samla ki rai ba ynda la koit kin bteng biang ïa ka jingshong shah thngan.
Katba ïa kawei ka samla pule jong katei ka skulbah kaba la kem tlot bad la hap ban kit noh sha ka jaka ai jingsumar da ka kali kit nongpang ha NEHU Health Centre.
La ïohi ba wat hapdeng ka jingtlot ruh, kitei ki samla ki la bteng bad pyneh beit ban shong shah thngan khnang ba ki jingdawa jong ki, kin long kiba urlong.
Ka jingshim rai jong ki samla ban pynlong da ka jingïakhih shong shah thngan ka dei hadien ba ka jingïakren bad u VC ka khlem seisoh ha kaba ka la mih ruh ka thma ktien kaba jur katta-katta namar ka jingbym treh ban ïakren bad ka kynhun ki samla pule halor kine ki jingdawa.
Hynrei kaei kaba la kham pynbitar shuh ïa ki samla pule ka skulbah ka long ba ha ka 6 tarik u Naiwieng 2024, na ka liang u Vice-Chancellor u la mih lyngba ki lad pathai khubor ha Shillong Press Club da kaba pynksan ba um donbor satia ban weng kam ïa u Registrar, Deputy Registrar bad kiwei ki ophisar bad na ka liang jong u ruh, u la ong ba un nym hiar shuki satia kum ka VC ka skulbah namar ïa ka jingshim rai baroh halor kane ka bynta, yn lah ban donbor tang da ka President ka Ri.
