Khliehriat, Naiwieng 07
Ka Bataw YWSC bad ka Rymbai Wahshnong ki la lah pynthikna ban rung sha ka quarter final ha ka lympung ïalehkai First Division Football Tournament 2024 ba la pynïaid da ka East Jaiñtia Hills District Football Association (EJHDFA).
Kane ka jinglah ban pynurlong ka la wan hadien ba ki la ïoh jingjop ha ka Sngi Palei ha madan Artificial Turf Diengshynrum kaba ha Khliehriat.
Ha ka jingïakhun kaba nyngkong, ka Bataw YWSC ka la pynliem noh ïa ka Pamrakmai SCSC da 1-0 kol. Ïa kane shi kol la thep da u Jespar Lamare ha ka minit kaba 36.
Haba phai sha kawei pat ka jingïakhun kaba bud, ka Rymbai Wahshnong ka la pynliem noh ïa ka Mukhaïalong SCSC da 1-0 kol bad ïa kane la thep da u Panegyric Rymbai ha ka minit kaba 23.
Nalor ka Bataw YWSC bad Rymbai Wahshnong, kiwei kynhun kiba la rung kham shwa sha ka quarter final ki long ka Wahïajer Narpuh YSSC, Rymbai Synrang Shahkhain, Jalyiah UTD SC, Shilliang Umshong, Ïatyllilang SC Hingaria bad ka Diengshynrum SC.
