Shillong, Naiwieng 07
Ka All Meghalaya Karate-Do Association (AMKA) ka la sdang ïa ka lympung ïalehkai 30th State Karate Championship ha ka Sngi Palei ha J.N Indoor Stadium, Polo da ka jingthmu ban jied ïa ki nongïalehkai kiba kynsai sha ka 6th Meghalaya Games.
Kane ka lympung ïalehkai balai sngi la wan ban plie da u Deputy Chief Executive Member jong ka Khasi Hills Autonomous District Council (KHADC) u Bah Pyn-shngaiñ N. Syiem, ha kaba la don lang u General Secretary ka Meghalaya State Olympic Association u Bah Finely L. Pariat lem bad u Joint Secretary ka MSOA, Bah P. Laloo.
Mynta u snem ki don 456 ngut ki nongïalehkai karate kiba ïashim bynta ha ka kumite (sparring) bad kata (demonstration of form) naduh kiba 6 snem ka rta haduh kiba heh la san.
Ka AMKA ka dei kawei na ki synjuk ïalehkai kaba trei shitom bha ha ka Jylla ban pynlong ïa kane ka lympung ïalehkai bad kumjuh ïa ka lympung ïalehkai kaba kyrpang na ka bynta ki skul bad kolej man la u snem, kaba ju pynïasoh lang da ki spah ngut ki nongïalehkai karate na kylleng ka Jylla. Ka AMKA ka la ju wanrah burom ruh ïa ka Jylla ha kaba ki nongïalehkai jong ka ki la ïoh ban khur takma ksiar ha ki jingïalehkai ha ka thaiñ, ri bad pyrthei.
“Ka AMKA ka la noh synñiang shibun lyngba ka jingïalehkai karate bad kane ka lympung ïalehkai ka dei ka rynsan bad ka lad ïa baroh ki samla shynrang bad kynthei ban pyni ïa ka jingtbit ka jong ki ha ka liang ka karate kumjuh ban wanrah ïa ka jingkmen ïa baroh kiba sakhi ïa ka,” la pynpaw u Bah Pynshngaiñ.
U la ai ka jingïaroh ruh ïa ka jingkyrshan pura ka tnat ïalehkai jong ka Sorkar Jylla bad u la ong ruh na ka liang ka KHADC kan ai ruh ïa kino-kino ki jingïarap bad ki jingnoh synñiang kumjuh na ka bynta kane ka synjuk.
Ha kawei pat ka liang u Bah Finely u la ong ba u ju sngewkmen ban leit sha ki jingïalang jong ka AMKA namar ba ka dei “kawei na ki synjuk jong ka jylla kaba bha tam” ha ka liang ka jinglong ryntih bad ka jingtreikam.
