Shillong, Naiwieng 07
Ka Sawmer SC ka la kiew sha ka kyrdan balai ha ka Shillong Premier League 2024 hadien ba ka la lah ban pynliem noh ïa ka Langsning FC da 1-0 kol ha ka Sngi Palei ha SSA Stadium kaba ha First Ground, Polo.
Kane ka nam jop ka la wan urlong lyngba ka kol u Orestar Sad (4) hadien ka jingïarap pynbuh bol da u Diego Khyriem.
Ha ka kylla miet, u Bisharlang Mawthoh u la jan ïoh thep na ka bynta ka Sawmer, hynrei um shym la lah ban pynurlong. Kumjuh ka Lang-sning ka la ïoh ïa ka kabu kaba biang lyngba u Melambha Shabong hynrei u nongapkol ka Saw-mer u Pyrshangbanbha Dkhar u la lah ban kyrda na ka jingshah thep.
Na ka liang u coach ka Langsning, Bah Khlaiñ Pyrkhat Syiemlieh u la bujli lai ngut ki rangïa-lehkai ha ka kylla step bad u la wanrah sa ar ngut tang hadien katto-katne por hynrei kam shym la lah pynpra ïa ki kynroh jong ka Sawmer.
Kumta lyngba kane ka jingshah rem ka Langsning ka la ïai sah ha ka kyrdan shatrai bad 3 point na ki saw sien ïakhun, katba ka Sawmer mynta ka la kamai 7 point ban ïaryngkat kyrdan bad ka Shillong Lajong FC bad ka Mawlai SC, kiba don ha ka kyrdan ba nyngkong bad ba-ar.
Ka jingïalehkai ha ka Sngi Thohdieng kan long hapdeng ka Nongrim Hills SC pyrshah ïa ka Rangda-jied United FC. Ka Nongrim Hills ka don ha ka kyrdan hynriew, hynrei ka la ïoh jingmyntoi na ka ‘walkover’ pyrshah ïa ka Laitkor ha ka jingïakhun kaba nyngkong, katba ka Rangdajied ka la shah rem ha ka Ryntih FC ha ka jingïalehkai ba la dep.
