Nongpoh, Naiwieng 08
Ki pulit ka nongbah Guwahati lyngba ka thanat Basistha hynnin ka miet ki la ïoh ban kem ïa 6 ngut ki briew na Assam ba kynthup ïa 2 ngut na ka thaiñ Byrnihat, kiba donkti ha ka kam shalan be-aiñ ïa ki masi na Assam sha Meghalaya ha ka jingbuddien kaba la pynlong ha Jorabat.
Katkum ka khubor ba la ïoh lum, la ïathuh ba nyngkong eh, ki pulit ki la ïoh ban bat shuwa ïa kawei ka trok kaba don ïa u nombor AS-01-QC-6402 kaba kit ïa 13 tylli ki masi ban pynpoi na Barpeta sha Meghalaya ïa kaba la synran da kawei ka kali rit kaba don ïa u nombor AS-01-BG-9260 naduh na Barpeta haduh jingkieng Jorabat.
La ïathuh ruh ba ka la don kawei pat ka kynhun na Meghalaya kaba la ap hangtei ha jingkieng Jorabat ban shimti synran pat ïa katei ka trok ha ki bynta jong ki surokbah ha Ri-Bhoi kaba la wan lyngba kawei ka kali kaba don ïa u nombor ML-10-C-0062.
Halor kane ka bynta, ki pulit ki la kem noh ïa 4 ngut ki briew na Assam kiba donkti shalan be-aiñ ïa ki masi ba kynthup ïa u Rabbel Amin (20) na Barpeta, u Saddam Ali (23) na Tarabari lem bad u Ibrahim Ali (20) bad u Ashraful Ali na Sarthebari.
Shuh shuh, ki pulit ki la kem ïa 2 ngut ki briew kiba dei na ki thaiñ Byrnihat kiba la thmu ban shimti synran ïa katei ka kali kit masi be-aiñ, kiba la tip kyrteng kum u Sunny Marak bad u Jyotish Kro.
