La khmih lynti ba kawei pa kawei ka Rympei Khasi ka dei ban long ka Kut baskhem jong ka Jaidbynriew Khasi kaba rit paid bad don tang kumba 4 lak ngut. Lada ki Rympei Khasi kim long ki Kut kiba skhem jong ka Jaidbynriew, te ka Lawei jong ka Jaidbynriew ka long kaba dum shisha.
Don bun ki nongshun kiba lah ban tor kyrthep, kiba lah ban pynjot pynpra bad pynduh ïa ka jinglong ‘Kut baskhem’ jong ki Rympei Khasi. Ka jingduk ka lah ban long kawei, namar haba la ban eh ka jignduk bad jingkyrduh la kum pyrkhat. La kum kren bad la kum leh bun kiei kiei kiba sniew. Ka jingpang bad jingbieit ruh ki lah ban long kiwei pat ki nongshun.
Hynrei dang lah ban don ruh kawei pat ki nongshun kiba wan ha ki dur kiba pher kum ka jingtlot ban ïaleh pyrshah ïa ki jingïaroh bad jingpynkhyllew. Don bun ki briew kiba trei la kum ki bordi na ka bynta ka jingbit jongno re jongno, kiba pli kim sngewdei ma ki, ne ka ïing jong ki, ne ka Jaidbynriew hynrei iohnong mano re mano.
Kawei pat ka nongshun ka dei ka jingieit palat ïa ki kam rongphong.Teng teng, don ki briew ki bym sngewthuh shuh ïa kaei ba ki leh ba la ieit eh ia ka rongphong, wat haba kita ki rongphong ki long kiba ktah ïa la ka burom la jong, shu ia tur lymm
uh la kum ka blang ka masi, khlem tip ïa ka riat ka ram. La don kiba ïa kren ba imat mynta kiba bun ki Rympei Khasi kim long shuh ki kut baskhem jong ka Jaidbynriew Khasi, la jur ka tynneng khlem tip shuh ïa ka dang ka duh. Lehse ka jingkitkhlieh kam dei eh tang ka jong ki paidbah, hynrei ka lah ruh ban long ka jong ki briew kiba dawa ïalade ba ki dei ki rangbah bad ki nongïalam. Ka Jaidbynriew Khasi ka don hapdeng ka jingma kaba khraw, lada bun ki rangbah bad nongïalamki pynlong ïa u paidbah tang kum u kynja diengbyllan ban pynioh suk ïa la ki jingthmu ban bha la ka met la jong.
U Nongsaiñ Hima, 1980
