Nongpoh, Naiwieng 08
Ha kawei ka jingjia kylla kali ha ka Sngi Thohdieng, u nongñiah jong ka trok kit ñiut kaba don ïa u nombor AS-01-RC-0613 u la khlad syndon hashen na ka jingshah ban ha ka trok kaba u ñiah bad pynher sted kaba la kylla khongpong ha ka surokbah National Highway-6 ha Umsning By-pass katba u nongbud pat u la shu mynsaw malu-mala.
Katkum ka khubor ba la ïoh lum, la ïathuh ba kane ka jingjia ka la jia ha ka por 2 baje eiei mynsngi katba katei ka trok kaba wan na sor Guwahati bad thmu ban leit pynhap ïa ki ñiut plastik sha ka kompani Dalmia Cement kaba don ha Thangskhai, hynrei mar ïa poi ha ki bynta jong ka Umsning By-pass, namar ka jingsted ba palat, u nongñiah um lah shuh ban teh lakam ïa ka kali bad leit ban tynrah shwa ïa u ‘Median Divider’ bad kylla khongpong pat sha ka liang jong ka surokbah kaba hiar na Shillong-Guwahati.
Ïa ka met jong u nongñiah katei ka trok uba la khlad noh ha kane ka jingjia ïa uba la tip kyrteng kum u Dawni Dkhar, 23 snem ka rta na ka shnong Madur, East Jaiñtia Hills, la pynkit noh sha ka jaka buh metïap jong ka Civil Hospital Nongpoh na bynta ban pyndep ïa ki jingdonkam katkum ki kyndon aiñ.
