Washington, Naiwieng:
Ka United States ha ka Sngi Thohdieng ka la pyntip ba ka Israel ka la dep pyntip sha ka US ba ka la pyllait ia ki khyrdop khappud hapdeng ka Israel bad ka Gaza na ka bynta ban ioh pynpoi ia ki lad jingiarap sha ki paidbah nongshong shnong jong ka nongbah Gaza.
Namar ha kine ki khyndiat sngi ba la leit, u Secretary of State jong ka US- u Antony Blinken bad u Defence Secretary ka US- u Lloyd Austin, ki la dep pynbeit ia ka Israel tat haduh ka 13 tarik jong u Naiwieng ba ka dei ban ai por ban ioh ban pynpoi ia ki lad jingïarap sha ki paidbah nongshong shnong ka Gaza.
Kumta la ong ba ka Israel hadien ba ka la plie biang ia katei ka bynta khappud na Erez, ka la pyntip sha ka United States ba kan sa plie bad ailad ruh ia ka jingleit rung ki tnat iarap lyngba ki khyrdop khappud ka Kissufim na ka bynta ban ioh pyndep ia ki kam kiba ka UN bad kiwei ki tnat iarap kiba thmu ban pynpoi ia ki lad jingïarap sha ki nongshong shnong ka Gaza. Ka Kissufim, ka dei ka thaiñ ba marjan bad ka Kibbutz mar shilliang na ka phang Shathie jong ka nongbah Gaza bad ka dei ka thaiñ kaba shah thombor ha ki Hamas ha ka 7 tarik u Risaw jong u snem 2023 ba la leit.
Ha ka jingthoh ba la phah da ka US sha Israel, la kyntu ia ka Israel ba ka dei ban ailad ia kumba 350 tylli ki trok ha ka shi sngi ba kin leit rung sha nongbah Gaza na ka bynta ki kam jong ka tnat iarap bad ha ka Sngi Ba-ar ki la don 229 tylli ki trok kiba la ioh rung sha Gaza na ka bynta kane.
Kum ban shu kdew hangne, ka Israel kam shym la ailad baroh shi katta ban pynpoi lad jingïarap sha Gaza bad ka la pynjur ia ka jingleit thombor sha man ki thaiñ bad ki bynta jong ka nongbah Gaza khnang ba kan ioh ban pynliem noh ia baroh ki dkhot ka Hamas kumba la thmu.
