Jowai, Naiwieng 08
Ka Nangbah Mulang ka la pynjem khnap haduh 10-1 kol ïa ka Shangpung Lumiamushai ha ka lympung ïalehkai Super Division Football Tournament (Kiang Nangbah Memorial Trophy 2024) ba la pynïaid da ka West Jaiñtia District Sports Association (WJDSA) ha ka Sngi Thohdieng ha Kiang Nangbah Stadium kaba ha Jowai.
U Niponghi Sumer u la ïoh hat-trick hadien ba u la ïoh ban thep lai kol ha ka minit kaba 39, 52 & 76, katba ïa kiwei pat la thep da u Suting Syrti ha ka minit kaba 5, kumjuh u Bastanlangmi Sutnga (17), Pynshai Lathong (27), Mediphrangki Pohleng (55), Timmy Ryngkhlem (82), Soniroy Suchiang (88) bad u Civility Khongmalai (90+2).
Hapdeng kane ka jingïakhun ka Shangpung Lumiawmushai ka la lah ban pynphai kylla shi kol lyngba u Mewathi Sungoh ha ka minit kaba 42.
Haba phai sha kawei pat ka jingïakhun hapdeng ka Demthring bad Wahïajer, ki la ïasam mar shi point hadien ba ïakhaid mar 1-1 kol.
Ha kane ka jingïakhun ka Wahïajer ka la ïoh ban pynkhih jar nyngkong eh lyngba u Deciduous Pyrtuh ha ka minit kaba 7, hynrei shwa ban wai ka Demthring ka la pynphai kylla lyngba u Justerwell Tham ha ka minit 90+2.
