Shillong, Naiwieng 08
Ka shi kol ba la thep da u Dibormi Kassar ka la biang pura ïa ka Rangdajied United FC ban wanphai da ka jingjop ha ka Shillong Premier League 2024, hadien ba ka la lah ban pynliem noh ïa ka Nongrim Hills SC da 1-0 kol ha ka Sngi Thohdieng.
Utei u rangïalehkai u la lah ban thep ïa katei ka shi kol ha shwa ban wai kata ha ka minit kaba 87 na ka bynta ban ïoh jingjop ba ar ha kane ka lympung bad ban jam na ka kyrdan bahynñiew sha basaw bad kamai 6 poiñ, katba ka Nongrim Hills ka la hiar na ka kyrdan bahynriew sha bahynñiew.
Ka jingïalehkai jong ka kylla step ka la long kaba sniew bha na baroh arliang mamla, ha kaba ki la don ki khep ba ki la jan thep kol, hynrei haduh kaba kut jong ka kylla step kim shym la lah ban thep kol.
Ka Nongrim Hills ka la pyrshang ban ïakhun tyngeh, hynrei kam shym la lah ban thep kol. Ha shwa ban wai ka Rangdajied ka la ïoh ïa ka kabu kaba biang bad u Dibormi um shym la pynlehnohei ïa kane ka kabu ksiar.
Ha ka Sngi Saitjaiñ kin don haduh ar tylli ki jingïalehkai ha kane ka lympung ha kaba ka Nangkiew Irat SC kan ïakynduh pyrshah ïa ka lahduh jong ka aïom ba la dep, ka Mawlai SC ha ka por 1 baje mynsngi ka ban bud pat da jingïakhun jong ka Shillong Lajong FC pyrshah ïa ka Ryntih FC ha ka por 4:30 janmiet.
Haba phai sha ka 1st Division Football League 2024, ka Nongkseh SC ka la ïasam mar shi poiñ pyrshah ïa ka Mawtawar SC hadien ba ki la ïakhaid mar 2-2 kol.
Na bynta ka Nongkseh la ïarap pynthep da u rangïalehkai ka liang pyrshah u Wallam Dkhar ha ka minit kaba 36 bad kawei pat la thep da u kapten u Chesterpaul Lyngdoh (63). Na ka liang ka Mawtawar ka la lah ban pynphai kylla ar kol lyngba u Khrawkupar Nongbri ha ka minit kaba 45+2 & 86.
