Shillong, Naiwieng 08
U Prof. Lakhon Kma uba dei u President ka North Eastern Hill University Teachers’ Association (NEHUTA), u la pynrem ïa ka jingleit ki dkhot jong ka seng saiñpyrthei Voice of the People Party (VPP) kiba la leit ban ïakynduh ïa u Vice Chancellor hapdeng ka jingïakhih jong ki samla pule.
Ha kajuh ka por u Nongïalam ki nonghikai u la ther tyngeh ruh ïa u Vice Chancellor, u Prof. Prabha Shankar Shukla uba pyni ba um pushe ei-ei ïa ka NEHU bad ïa ki samla ba pule ha katei ka skulbah.
U la ong ba u VC u kloi ban leit sha press club ban kren haduh shiteng kynta, katba hakhmat ophis treikam jong u tang ar-kam um lah ban ïaid ban kylli ïa ki khynnah ki ïalong kumno.
“Phi ju ïohsngew ba u VC uba shu peit-siar na jingkhangïit ïa ki samla pule ba shong shah thngan bad um bym pushe pat ban kylli ki ïalong kumno. U dei ma u ka daw ba la pynlong haduh katne ïa ka NEHU, u da rben snieh doh shisha, ngam tharai ba un ieh ïa ka shuki”, la ther u Bah Lakhon.
U la ong ba lada u VC um leh ei-ei noh, kane ka jingïakhih kan sa bthei shuh shuh. “Ka dei ka kamram jong u ban leh ei-ei wut-wut um lah ban shu long tang u nongpeitkai, mynta ka shong beit ha u VC”, u la ong.
Halor ka jingleit jong ki nongïalam ka VPP ha ka sngi Palei sha NEHU, u Prof. Kma u la ong lada ki leit sha NEHU ki la dei ban leit sngewlem shwa ïa ki samla pule ym ban shu leit beit sha kamra treikam u VC, kata kam dei kaba donkam.
“Ki (NEHUSU) la sngewrem shisha hynnin ka sngi, ki don ha ka jingshah thngan, katba kita pat ba shu wan na shaei-shaei kin leit beit sha u VC ha ka jaka ban sngewlem ïa ki samla pule”, u la ong. U la ong ban shu leit ïakren sngewthuh ka NEHUTA ka la dei ban leit naduh mynno, hynrei mynta kam dei shuh tang ha kajuh ka phang, ki dei ban sngewthuh ban pynhun pynjemnud ïa ki samla pule namar ma ki kiba shong shah thngan.
Na ka liang ka NEHUTA bad MeTTA ha ka sngi Thohdieng ki la leit ban pynsngew ha u Lat ka Jylla, u C.H Vijayashankar ïa ka jinglong-jingman hapoh ka skulbah NEHU ha kine ki khyndiat sngi, bad na ka liang u Lat uba dei u Chief Rector jong ka NEHU u la kular ban shim khia ïa kaei kaba ka kynhun ki nonghikai ki la pynsngew.
