Mawkyrwat, Naiwieng 10
Ki ‘riew paidbah jong ka dong ka thaiñ Mawkyrwat ki la pynpaw ka jingsngewsih kaba khraw halor ka jingduh noh i Kong Kmoiñ Wahlang ban leit shim bynta ha ka jingïakob mareh jong ka 13th Pan Pacific Masters Games 2024 kaba la long ha Gold Coast Queensland, Australia na ka daw ka jingshah kyntait ïa ka visa.
Na ka liang ka Sports Committee jong ka seng KSU South West Khasi Hills District, u Pauldeep Tongwah, u la pynpaw ka jingsngew diaw kaba khraw halor ka jingshah kyntait ka visa kaba la pynduh ïa ki 3 ngut ki nongmareh ba pawnam ka jylla ban leit shim bynta sha katei ka jingïakob.
U Pauldeep u la pynrem jur ïa ka sorkar lyngba ka tnat ïalehkai jong ka Sorkar Jylla ka bym shim ïa ka jingkit-khlieh ne shim khia lang ha kaba ïadei bad ka jingpynbit-jingpynbiang ïa ka VISA.
Utei u samla u la pynpaw ruh ka jinglyngngoh ba kumno ki MLA bad ki heh saipan ki ïoh leit katba mon sha kiwei ki ri jong ka pyrthei ban leit shang kai sngew-bha, katba ïa ki nongïalehkai sports pat kiba ki wanrah nam bad burom ïa ka Jylla ki shah kyntait pynban.
