Shillong, Naiwieng 10
Ka Shillong Lajong FC bad ka lahduh jong ka aïom ba la dep, Mawlai SC ki dang dei ki kynhun kiba dang lah ban ïai bteng ïa ka jingjop ha ka OC Blue Shillong Premier League 2024 ha ki ar tylli ki jingïalehkai kiba la long ha ka Sngi Saitjaiñ ha SSA Stadium kaba ha First Ground, Polo.
Ha kane ka jingïakhun ka Mawlai ka la pynliem noh ïa ka Nangkiew Irat SC da 2-1 kol shwa ba ka Lajong kan pynjem khnap ïa ka Ryntih FC da 3-0 kol ha ka jingïalehkai kaba nyngkong.
U Ïohborlang L. Lyng-khoi (14), Deibormame Tongper (73) bad u Yohaan Benjamin (80) ki la ïoh ban thep kol na ka bynta ka SLFC, katba ka Mawlai ka la ïakynduh mawsiang ha shwa ba kan ïoh jingjop. U Donlad Diengdoh (27) bad u Arkibor Makhroh (60) ki la ïoh ban thep kol na ka bynta ka Mawlai, hynrei u Wallamsuk Nongkhlaw (43) u la lah ban pynphai kylla shi kol na ka bynta ka Nangkiew Irat.
Baroh lai tylli ki kol ha kane ka jingïakhun kaba kham ha shwa la thep da ka khlieh, ha kaba u Donlad u la thep kol nyngkong ha shwa ba u Wallamsuk un pynphai kylla ha kaba u rangapkol ka Mawlai u Lambhamiki Lamare um shym la lah ban kyrda na ka jingshah thep. Hynrei u Wallam bad u kapten jong ka Mawlai, u Brolington Warlarpih, ha ka jingbitar kaba jur bha, ki la ïaleh pyrshah mar kylliang hadien ba ki la sdang ban ïa pyni bor ryngkat ki kyntien kiba long pyrshah kaba pynlong ïa kine baroh ar ngut ban shah beh shi syndon na madan hadien ba ki la ïohpdiang da ki red card ha u rephri shwa ban kut ka kylla step.
Namar ba u dei u nongïalehkai ba kongsan jong ki ha ka jingïakhun, ka jingbym don u Wallamsuk ka la long ka jingma kaba khraw ïa ka Nangkiew Irat, katba ka Mawlai ka la lah ban ïashan tyngeh wat la ka la duh ïa u Brolington, uba long u rangïalehkai dien ba la tbit.
Ka kol jong ka jingjop ka la wan ha ka kynta ha kaba u Arkibor u la thep lyngba ka free-kick. U la ïoh mih madan ha ka kylla step bad u la long uba kongsan bha ha kane ka jingïalehkai.
Haba pha sha kawei pat ka jingïakhun, u Ïohborlang u la thep kol nyngkong eh na ka bynta ka Lajong lyngba ka free-kick, kaba la buh ïa ka Ryntih ha ka jingeh. Kane ka dei ka sien kaba nyngkong ha kane ka samoi ba ka Ryntih ka la shah pynphai kol ha ka kylla step.
Kumba long ha ki jingïalehkai ba la lah, u Ryntih u la shah thep ha ka kylla miet bad u Deibormame u la ïalehkai bha n aka bynta ban thep kol ha ka minit kaba 73 shwa ba un pynbuh bol na ka bynta u Yohaan hadien katto katne minit. Kane ka kol kaba khatduh ka la wan hadien ba ka Ryntih ka la ai khlem da pyrkhat bha ïa ka bol bad ka Lajong ka la shim ïa ka kabu kaba biang eh.
Te kumta ka Lajong bad ka Mawlai ki la kamai mar 10 point, hynrei ka SLFC ka la ïoh ban bat ïa ka kyrdan ba nyngkong hadien ba la tam da ka jingïapher ha ka jingthep kol (+8 & +5).
Kane ka lympung kan bteng biang ha ka sngi Balang ha kaba ka Sawmer SC kan ïakynduh pyrshah ïa ka Nongthymmai SC ha ka 1 baje nohphai sngi, katba ka Langsning FC ïa ka Ryntih ha ka por 4:30 janmiet.
Katba ka jingïalehkai ha ka 1st Division mynta ka lah sngi U Blei kan long hapdeng ka Malki SC pyrshah ïa ka Mylliem SC ha ka por 12:15 mynsngi bad ka Sohryng-kham SC ïa ka Lawsohtun SC ha ka por 3:15 nohphai sngi.
