Chilpancingo, Naiwieng:
Ki bor pynïaid ka Mexico ha ka Sngi Palei ki la ioh tam ia 11 tylli ki metiap na ka ‘trailer’ jong kawei ka trok. Napdeng kine 11 tylli metiap, 2 ngut ki dei jong kynthei bad 2 ngut jong khynnah kiba la khlad bad kiba don hapoh jong katei ka trok. Kane ka la jia ha ki thaiñ Shathie jong ka Mexico, kaba long kawei na ki thaiñ kaba ka jingkhaii drok ruh ka jyllei bha.
Kumta ki bor pynïaid jong ka Chilpancingo ki la pyntip ba ki dang phah ban bud-dien bad wad bniah ha kaba iadei bad katei ka jingjia bad la ong ruh ba wat u nongrah ktien jong katei ka thaiñ u dang dep shah khrai khlieh ha kine ki taiew ba la leit.
Katei ka thaiñ ka long ka nongbah jong ka phang South Guerrero, kaba da ki snem mynta ka la jyllei katta-katta ha ki kam thombor bad ki kam pyntriem jong ki runar khamtam ki jingiakynad para nongkhaïi droks.
Namar la ong ba ki bor pynïaid dang ha kane ka taiew ba la dep ruh ki dang phah wad bniah halor ka jingjah rngai jong 17 ngut ki briew, kynthup ia 5 ngut ki khynnah na katei hi ka thaiñ, hynrei kim lah pat ban pyn- tikna la kane ka jingjia ka don jingiadei ne em bad katei kaba la dep jia ha ka taiew ba la leit.
Ia katei ka trok kaba la lap ia kitei ki metiap, la shem na ka surok-bah Acapulco, kaba mynshuwa ka ju long ka jaka lehkai bad ka jaka rudnong kaba itynnad, hynrei mynta ka la kylla long ka thaiñ kaba ma tam ha katei ka ri.
Kane ka la jia ruh tang hadien katto- katne sngi ba 5 ngut ki dkhot jong kawei ka longïing na ki bynta khappud jong ka Acapulco ki la shah pyniap dusmon ha ki runar bym don jing-ithuh.
Hynrei, kiba bun kum kine ki jingjia ki dei namar ka jing jyllei ki kam khaii drok bad ka jingbun ki runar lane ki kynhun runar kiba ju khaii bad shalan ia u drok kylleng jong katei ka ri.
